„Þetta er galið og glórulaust að KSÍ leyfi þessu að gerast“

KR tapaði illa fyrir nágrönnum sínum í Val í gærkvöldi þar sem topplið Vals vann 0-6 sigur að Meistaravöllum. 

Þetta var fyrsti leikur KR liðsins síðan 9.ágúst síðastliðinn; heill mánuður á milli leikja í ágúst og september er eitthvað sem fæst fótboltalið á Íslandi hafa upplifað enda vanalega nóg um að vera í leikjum á þessum tíma árs.

Þegar leikjaáætlun KR liðsins í sumar er skoðuð nánar verður að viðurkennast að ekki er hægt að segja að það komi á óvart að liðið hafi ekki náð upp miklum takti í leik sinn því frá 20.júní-9.september lék liðið aðeins þrjá leiki.

„Þetta var heill mánuður sem við spiluðum ekkert; mættum bara á æfingar og þetta var drepleiðinlegt. Þetta eru þrír leikir sem við höfum spilað á síðustu 80 dögum. Þetta er galið og glórulaust að KSÍ hafi leyft þessu að gerast,“

„Við tókum EM pásu eins og öll lið en spilum svo við Breiðablik áður en þær fara í Evrópukeppni og erum óheppnar með að næsti leikur er við Val sem var líka í Evrópukeppni og fór í bikarúrslit. Þetta var því frestaður leikur síðan í ágúst,“ segir Guðmunda Brynja Óladóttir, einn reynslumesti leikmaður KR liðsins.

„Það er frekar súrt að fara í tvær mánaðarpásur á jafn stuttu tímabili og við spilum á Íslandi,“

KR-ingar eru nýliðar í Bestu deildinni og eiga raunar ekki góðar minningar frá síðustu veru sinni í deildinni þar sem Vesturbæjarliðið lenti afar illa í Covid lönguvitleysunni sumarið 2020

„Þetta hefur minnt á Covid tímabilið þar sem var bara sóttkví eftir sóttkví,“ segir Guðmunda.

Viðtalið við Guðmundu í heild má sjá í spilaranum hér fyrir neðan en þar ræðir hún einnig þjálfarabreytingar sem hafa verið tíðar hjá KR í sumar.