„Vinkonur síðan að við vorum ungar þannig að við fögnum þessu bara“

Guðrún vann sig inn í byrjunarliðið á síðasta ári og tók þá við hlutverki Ingibjargar við hlið Glódísar Perlu Viggósdóttur í miðri vörninni. Eftir tvo leiki á EM kom Ingibjörg aftur inn í liðið í stað Guðrúnar fyrir 1-1 jafnteflið við Frakka, og Ingibjörg var aftur í vörninni í 6-0 sigrinum gegn Hvíta-Rússlandi á föstudaginn.

„Þetta er bara mjög holl samkeppni og gerir öllum mjög gott að hafa þessa samkeppni. Ég tek henni bara fagnandi og nýti mín tækifæri eins vel og ég get, og reyni svo bara að styðja hinar þegar þær fá tækifæri,“ segir Ingibjörg um þessa jöfnu samkeppni en viðtal við hana sem tekið var fyrir æfingu í Utrecht í gær má sjá hér að neðan.

Þær Guðrún léku saman hjá Breiðabliki á árunum 2012-2017 en eru núna báðar atvinnumenn – Ingibjörg hjá Vålerenga í Noregi en Guðrún hjá Rosengård í Svíþjóð. Ingibjörg segir sambandið þeirra á milli því gott þó að báðar vilji auðvitað vera í byrjunarliði Íslands:

„Mjög gott. Við erum búnar að vera vinkonur síðan að við vorum ungar þannig að við fögnum þessu bara og styðjum hvor aðra.“

Íslandi dugar jafntefli hér í Utrecht annað kvöld, til að sleppa við umspil og komast beint á HM. Andstæðingurinn er hins vegar lið sem vann silfurverðlaun á síðasta HM árið 2019.

„Veit ekki einu sinni hvernig tilfinning það væri“

„Þetta verður erfiður leikur þar sem við munum þurfa að berjast töluvert meira en á föstudaginn [gegn Hvíta-Rússlandi]. Þetta verður allt öðruvísi en þá. Þær eru með heimsklassaleikmenn í öllum stöðum svo það verður ekkert hægt að slappa af eða fá tækifæri til að missa fókus.

Þær eru með góða leikmenn í öllum stöðum sem eru vanar að spila svona leiki í hverri einustu viku, gegn toppliðum. Við þurfum að vera þéttar varnarlega og vera klárar í að taka hraðar sóknir líka. Við þurfum líka að vera þolinmóðar með boltann þegar við fáum hann,“ segir Ingibjörg.

Grindvíkingurinn hefur farið með íslenska landsliðinu tvisvar í lokakeppni EM en það að komast á HM yrði auðvitað enn stærri áfangi:

„Þetta er eitthvað sem okkur hefur dreymt um mjög lengi og ég veit ekki einu sinni hvernig tilfinning það væri að tryggja sig inn á HM. Vonandi fáum við að sjá það [á morgun].“

Ísland og Holland mætast á morgun í Utrecht í úrslitaleik um öruggt sæti á HM. Leikurinn hefst klukkan 18:45 að íslenskum tíma. Tapliðið fer í umspil. Vísir er á staðnum og flytur fréttir heim af stelpunum okkar.