Kristín komin með vilyrði fyrir leikskólaplássi en það mun ekki þagga niður í henni

En hver er þessi Kristín Tómasdóttir sem tók Ráðhúsið í gíslingu á dögunum. Sindri Sindrason hitti Kristínu í kaffibolla á dögunum og ræddi við hana í Íslandi í dag á Stöð 2 í gærkvöldi.

Yngsta barn hennar er átján mánaða og ekki enn komin inn á leikskóla.

„Þetta fór svo í taugarnar á mér að sitja undir þessu og reyna redda henni pössun út í bæ. Svo ég fór að láta heyra í mér því mér fannst þetta eitthvað svo út úr kú þetta mál. Ég er ekki ein í þessu sporum, við erum átta hundruð foreldrar sem eru í þessum sporum og við áttum bara að þegja og sýna þessu skilning,“ segir Kristín sem starfar sem fjölskylduráðgjafi.

„Þetta er rosalega lélegur þrýstihópur því svo fær maður pláss og þá þegir maður. Við höfum ekkert bolmagn að vera standa í þessu, ungbarnaforeldrar hafa svo margt annað að gera. En ég er að mana mig upp í að halda áfram.“

Kristín er sjálf komin með vilyrði fyrir því að barnið hennar komist inn á leikskóla.

„Ég ætla ekki að þegja í kjölfarið. Ég ætla reyna fylgja þessu eftir þannig að þetta kerfi breytist svo þetta sé ekki svona mikið vandamál. Þetta er ekkert svona á Norðurlöndunum og eða í öðrum sveitarfélögum hérna í kringum okkur. Það er bara eitthvað alveg galið við kerfið sem við búum við og það þarf að breyta því frá grunni.“

Hér að neðan má sjá innslagið í heild sinni.