Þungir dómar fyrir grófar frelsis­sviptingar og líkams­á­rásir

Mennirnir þrír, Otri Grettir Otrason, Aron Bjarni Stefánsson og Sindri Freyr Sigurbjartsson voru sakfelldir fyrir sérstaklega hættulega líkamsárás, frelsissviptingu, og hótanir með því að hafa í félagi svipt mann frelsi í sex klukkustundir og veist að honum ítrekað með ofbeldi. 

Þeir kýldu hann meðal annars og slógu í andlitið, felldu hann í jörðina þar sem þeir spörkuðu ítrekað í hann uns hann var reistur við og bundinn við stól, fötin skorin utan af honum og sokkum troðið í munn hans og héldu áfram að kýla og slá hann ítrekað ásamt því að slá hann með felgulykli, eða álíka áhaldi, í fætur, slá hann með hnífabrýni, eða álíka áhaldi, í rifbein, maga og háls, slá hann með belti, sparka í kynfæri hans og setja fætur hans í fötu eða kar með ísköldum hreinsivökva og hella sama vökva yfir hann, að því er segir í dómi Héraðsdóms Reykjaness.

Þá var Otri Grettir einnig sakfelldur fyrir rán með því að hafa tekið fjármuni út af bankareikningi brotaþola, með því að neyða hann til að gefa upp leyninúmer bankakorts hans, og að hafa stolið bifreið móður hans nytjastuldi.

Frömdu sams konar brot skömmu áður

Þá voru þeir sakfelldir fyrir líkamsárás, frelsissviptingu og ólögmæta nauðung með því að hafa í félagi svipt annan mann frelsi í þrjár klukkustundir og veist að honum með ofbeldi, þar sem þeir meðal annars kýldu hann ítrekað í höfuð og búk, spörkuðu í hann liggjandi, handjárnuðu hann við stól og spörkuðu í kynfæri hans ásamt því að hóta honum frekara ofbeldi uns þeir létu hann lausan. Þá létu þeir manninn fylgjast með því ofbeldi sem lýst er hér að ofan.

Foreldrar stúlku hafi lofað greiðslu fyrir árásina

Otri Grettir bar fyrir dómi að hann hefði komið að staðnum þar sem frelsissviptingin var framkvæmd að beiðni meðákærða Arons, sem hafi sagt að foreldrar stúlku hafi boðið hálfa milljón króna fyrir að berja fyrrgreindan brotaþola. Sá hafi nauðgað stúlkunni. Otri Grettir játaði sök að hluta fyrir dómi en sagði hina tvo hafa gengið lengra í ofbeldinu.

Aron Bjarni neitaði sök í málinu og benti á félaga sína tvo. Hann kvaðst hafa verið á staðnum en ekki stöðvað ofbeldið vegna þess að hann hafi frosið á tímabili þar til hann hafi séð hversu illa brotaþoli var haldinn.

Hann kvaðst sjá eftir þessu öllu saman en að hann vissi af eigin raun hvernig það væri að lenda í frelsissviptingu.

Sindri Freyr játaði sömuleiðis sök að hluta en kvað hina tvo hafa beitt megninu af ofbeldinu. Þá kvaðst hann einnig sjá eftir atvikum enda vissi hann af eigin raun hvernig væri að verða fyrir frelsissviptingu.

Dómari komst að þeirri niðurstöðu, með vísan til framburðar vitna og sakborninga, að þeir hefðu allir gerst sekir frelsissviptingar og líkamsárásir en Otri Grettir einn um ránið.

Móðir stúlku sakfelld fyrir hótanir

Fjórir sakborningar voru í málinu en auk mannanna þriggja var móðir stúlkunnar, sem sögð er hafa verið nauðgað af öðrum brotaþola, sakfelld í málinu. Hún var sakfelld fyrir að hafa sent manninum skilaboð sem voru til þess fallin að vekja hjá honum ótta um líf, heilbrigði og velferð hans. Skilaboðin voru eftirfarandi:

„Allir muna vita hvað þu gerðir helvitið þitt, eg skal sjálf sjá til þess að þú rotnir í hreinasta helviti mannógeðið þitt. Þú vili ekki einu sinni ímyndað þer hvað sé i vændum hja þer,“ og „Þu munt deyja.“

Ákvörðun refsingar hvað varðar móðurina var frestað til tveggja ára.

Þungir dómar

Sindri Freyr hlaut þyngstan dóm eða þriggja ára fangelsisvist, þar af 33 mánuði skilorðsbundið með sömu skilmálum. Um var að ræða upptöku af fyrri tuttugu mánaða dómi.

Otri Grettir var dæmdur í tveggja ára fangelsi en fullnustu 21 mánaðar var frestað til fimm ára, haldi hann almennt skilorð.

Aron Bjarni var dæmdur til átján mánaða fangelsisvistar, þar af fimmtán skilorðsbundinna með sömu skilmálum. Hann á að baki fjóra refsidóma..

Ástæða þess að svo stór hluti refsingar mannanna er skilorðsbundin er dráttur á rannsókn málsins. Atvik þau sem mennirnir voru sakfelldir fyrir áttu sér stað fyrir fjórum árum. 

Mennirnir voru auk þess dæmdir til að greiða fyrrgreindum brotaþola tvær og hálfa milljón króna í miskabætur. 

Dóm Héraðsdóms Reykjaness má lesa í heild sinni hér.