Mikil­vægt að undir­búa sig undir að gosið standi yfir í langan tíma

Í tilkynningu á vef Veðurstofunnar segir að framgangur gossins síðustu daga hafi verið eins og við mátti búast.

„Á gervihnattamyndum sem sýna landbreytingar á Reykjanesskaga frá lok júlí má sjá merki um aflögun skammt norðaustur af Grindavík. Aflögunin sem sést á gervihnattamyndunum er við upptök skjálftans sem varð 31. júlí og mældist M5.5,“ segir í tilkynningunni.

Á fundi Vísindaráðs var farið yfir fleiri gögn frá svæðinu, til dæmis GPS-mælingar og skjálftagögn. Gögnin sýndu engar vísbendingar um að kvika væri þarna á ferðinni og samkvæmt ráðinu er líklegasta skýringin á aflöguninni breytingar á yfirborði sem urðu fyrir um tíu dögum síðan.

„Engu að síður munu vísindamenn safna frekari gögnum til að staðfesta enn frekar að svo sé. Rætt var að mikilvægt væri að auka vöktun enn frekar á þeim umbrotasvæðum sem geta haft áhrif nærri byggð með því að setja upp fleiri mælitæki til rauntímavöktunar,“ segir í tilkynningunni.