„Þessi dæmi koma við mig og sýna svart á hvítu að það þarf klárlega að gera betur í þessum málum“

Í vikunni hefur verið fjallað um stöðu heyrnarlausra barna hér á landi og þjónustu við þau. Móðir heyrnarlauss drengs sem kært hefur leikskóla hans til mennta- og menningarmálaráðuneytisins vegna þjónustuleysis steig fram í kvöldfréttum í vikunni og sagðist oft ekki treysta sér til að senda son sinn á leikskólann þótt skólinn sérhæfi sig í að mæta þörfum heyrnarlausra barna. 

Hún segir að stundum hafi drengurinn engan til að eiga samskipti við þar sem oft vanti táknmálstalandi starfsmann á vak og óttast að þurfa að flytja út fyrir landsteinana í leit að þjónustu fyrir barnið.

Lög sett en síðan lítið sem ekkert gerst

Ellefu ár eru síðan lög voru sett um stöðu íslenskrar tungu og íslensks táknmáls, en samkvæmt þeim er íslenska táknmálið jafnrétthátt íslenskunni og óheimilt að mismuna mönnum eftir því hvort málið þeir nota. 

Formaður félags heyrnarlausra sagði í kvöldfréttum í gær að lögunum væri ekki nægilega framfylgt og að ábyrgð yfir málaflokknum væri allt of dreifð. Lítið sem ekkert hafi gerst í málaflokknum síðan lögin voru samþykkt.

„En síðan þá hefur engin aðgerðaráætlun fylgt og ekkert fjármagn fylgt með þannig það eru alls kyns hindranir í samfélaginu sem koma í veg fyrir að heyrnarlausir njóti jafnræðis miðað við aðra,“ sagði Heiðdís Dögg Eiríksdóttir, formaður Félags heyrnarlausra.

Fréttirnar sýni svart á hvítu að gera þurfi betur

Lilja D. Alfreðsdóttir, menningarmálaráðherra er með málaflokkinn á sínu borði. Hún segir að fréttir af þjónustuleysi við heyrnarlaus börn hafi fengið á hana.

„Þessi dæmi koma við mig og sýna svart á hvítu að það þarf klárlega að gera betur í þessum málum og ljóst að þjónusta við heyrnarlausa getur verið mjög mismunandi eftir því hvar hún er veitt.“

Aukið samræmingarhlutverk ríkisins í málaflokknum

Þá segir hún að umfangsmikil vinna hafi átt sér stað til þess að gera verulegar útbætur.

„Við höfum hins vegar ekki setið með hendur í skauti og umfangsmikil vinna hefur átt sér stað til þess að gera verulegar úrbætur en tillaga til þingsályktunar um málstefnu íslensks táknmáls ásamt aðgerðaáætlun til þriggja ára, sem inniheldur 41 aðgerð, var í opnu samráði þar til í júní. Meðal aðgerða sem eru lagðar til er til að mynda aukið samræmingarhlutverk ríkisins í málaflokknum, meðal annars með tilliti til þjónustu í þágu farsældar barna.

Vinnan er afrakstur starfshóps sem skipaður var fulltrúum Málnefndar um íslenskt táknmál, Félags heyrnarlausra og Samskiptamiðstöðvar heyrnarlausra og heyrnarskertra með víðtæku samstarfi við sérfræðinga í málaflokknum.

„Táknmálssamfélagið var boðað til umræðufundar þar sem drögin voru rýnd og tekið var tillit til athugasemda er komu fram á fundinum.“

Segir að stjórnvöld muni einhenda sér að gera betur

Hún segir að nú sér verið að yfirfæra þær ábendingar sem sendar voru inn í opna samráðinu.

„Og gera stefnuna ásamt aðgerðaáætluninni tæka til þinglegrar meðferðar. Að henni lokinni munu stjórnvöld í samstarfi við sveitarfélögin einhenda sér í að framkvæma aðgerðaáætlunina með það að markmiði að gera betur í þessum málaflokki.“