Fótbolti

Toppliðin skildu jöfn og Víkingur upp í þriðja sæti

Hjörtur Leó Guðjónsson skrifar
FH-ingar eru á toppnum í Lengjudeildinni.
FH-ingar eru á toppnum í Lengjudeildinni. Vísir/Anton

Þrír leikir voru á dagskrá í Lengjudeild kvenna í knattspyrnu í kvöld. FH og Tindastóll skiptu stigunum á milli sín þegar liðin gerðu 1-1 jafntefli í toppslag deildarinnar, Víkingur R. lyfti sér upp í þriðja sætið með 0-2 sigri gegn Fjölni og Grindavík og Fylkir gerðu markalaust jafntefli.

Það var Hugrún Pálsdóttir sem kom Tindastóli yfir gegn FH í Hafnarfirðinum í kvöld með marki á 22. mínútu og sá til þess að staðan var 0-1 þegar gengið var til búningsherbergja.

Eftir þunga sókn heimakvenna í síðari hálfleik var það svo hún Telma Hjaltalín Þrastardóttir sem jafnaði metin fyrir FH-inga á 83. mínútu og tryggði liðinu 1-1 jafntefli.

FH og Tindastóll sitja því enn í efstu tveimur sætum deildarinnar, en bæði lið hafa náð í 20 stig. FH er þó með betri markatölu og hafa leikið einum leik minna.

Þá skoraði Sigdís Eva Bárðardóttir bæði mörk Víkings er liðið vann 0-2 sigur gegn Fjölni fyrr í kvöld. Sigurinn lyfti liðinu tímabundið upp í annað sæti deildarinnar, en eftir jafntefli FH og Tindastóls sitja Víkingar í þriðja sæti með 19 stig. Fjölnir situr hins vegar í næst neðsta sætinu með fjögur stig.

Að lokum gerðu Grindavík og Fylkir markalaust jafntefli í Grindavík, en liðin sitja í sjöunda og áttunda sæti deildarinnar. Grindavík er með átta stig eftir níu leiki, en Fylkir sjö stig eftir átta leiki

Lengjudeild kvenna FH Tindastóll Víkingur Reykjavík Fjölnir UMF Grindavík Fylkir

Mest lesið


Fleiri fréttir

Sjá meira


×

Mest lesið