Birna Valgerður heim til Keflavíkur

Birna Valgerður er uppalinn hjá Keflavík og lék síðast með liðinu tímabilið 2018-19. Þá skoraði hún níu stig og tók 3,5 fráköst í leik þrátt fyrir að vera aðeins 17 ára gömul. Síðustu þrjú ár hefur Birna spilað í bandaríska háskólaboltanum en Keflvíkingar tilkynntu um það í dag að hún væri snúin heim.

„Eftir þrjú ár í háskólaboltanum úti er ég mjög spennt að vera komin aftur heim til að spila með uppeldisfélaginu. Ég hlakka til að taka aftur þátt í íslenska boltanum. Ég ætla mér að æfa vel í sumar en markmiðið okkar er að vera vel undirbúnar fyrir komandi átök og gera enn betur en í fyrra.“ er haft eftir Birnu á heimasíðu Keflavíkur.

Keflavík hafnaði í 5. sæti Subway-deildarinnar á síðustu leiktíð og rétt missti því af sæti í úrslitakeppninni.