Biðst afsökunar á að hafa ekki upplýst almenning

Forstjóri og stjórnarformaður Bankasýslunnar mættu fyrir fjárlaganefnd Alþingis í morgun eftir að fundinum hafði einu sinni verið frestað. Þingmenn mættu sannarlega tilbúnir.

Lárus Blöndal stjórnarformaður sagði, þegar hann sat undir spurningum Björns Leví Gunnarssonar Pírata, að þetta væri orðin „skrýtin yfirheyrsla“, enda hafði honum verið gert að svara já eða nei við tugum spurninga.

Í samtali við fréttastofu sagði Lárus: „Þetta eru náttúrulega merkilegir fundir, sérstaklega þegar þeir eru í beinni útsendingu. Og mér fannst þetta nú kannski ekki það sem ég átti von á. Þegar maður er farinn að fá já og nei spurningar í tugatali er það náttúrulega svolítið skrýtin aðferðafræði til að eiga samskipti.“

Jón Gunnar Jónsson, forstjóri Bankasýslunnar, ítrekaði ánægju sína með fjárhagslega niðurstöðu útboðsins. 

En 83% eru óánægð, hvað veldur þessu misræmi í ykkar ánægju og almennings? 

„Ég held að við horfum aðallega til fjárhagslegrar niðurstöðu útboðsins. Það voru kannski engar skoðanakannanir gerðar um fjárhagslegar niðurstöður útboðsins og eitthvað svoleiðis. En það hefur átt sér stað umræða í þjóðfélaginu, meðal annars á grundvelli ýmissa atriða,sem síðar komu í ljós, eins og mögulegra hagsmunaárekstra og svo framvegis. Og það hefur kannski dálítið mótað umræðuna,“ sagði Jón Gunnar.

Samkvæmt könnun sem Prósent framkvæmdi fyrir Fréttablaðið er ríkisstjórnin fallin. Sjálfstæðisflokkurinn mælist með sögulega lágt fylgi, 17,9%. Stjórnarandstaðan hefur sakað stjórnarliða um að varpa ábyrgð á bankasölunni yfir á Bankasýsluna, þegar endanlega ábyrgð sé fjármálaráðherra.

Þorbjörg Sigríður Gunnlaugsdóttir, þingmaður Viðreisnar, sagði að Bankasýslan hafi á fundinum lýst því mjög greinilega að hafa verið í náinni samvinnu við fjármálaráðuneytið allan tímann, ekki síst á söludaginn sjálfan. „Þeir voru líka mjög skýrir um það að þeir hefðu í einu og öllu framfylgt ákvörðunum sem fjármálaráðherrann tók um það hvernig þetta ferli ætti að vera,“ sagði Þorbjörg.

Alveg í samræmi við upplegg stjórnmálanna

Lárus Blöndal segir það daprar fréttir að óánægja sé á meðal almennings með niðurstöðu útboðsins.

„Ég er allavega þeirrar skoðunar að þetta verkefni hafi verið framkvæmt algerlega í samræmi við það upplegg sem við vorum með og hafði farið í gegnum nefndir þingsins, Seðlabankann og auðvitað í gegnum ráðherranefnd og síðan náttúrulega með samþykki ráðherra.

 Ég tel að við höfum fylgt því mjög nákvæmlega og þetta varði í raun aðra þætti en þá framkvæmd, ef menn eru ósáttir. En það smitar inn í þessa umræðu að það eru þarna einstaklingar og fyrirtæki sem eru eigendur sem tengdust fjármálakerfinu fyrir hrun og það setur marga í uppnám augljóslega en við því getum við augljóslega ekkert gert af því að það eru ekki lagaheimildir til að útiloka fólk á grundvelli slíkrar sögu,“ segir Lárus. 

Spurður hvort honum líði eins og verið sé að reyna að varpa ábyrgðinni á Bankasýsluna, segir Lárus Blöndal: „Það er allavega í orði ekki sagt af hálfu fjármálaráðherra. En hins vegar er sagt að menn vilji skoða breytingar á umhverfinu þannig að þetta sé fært nær ráðherra og mögulega þinginu. Ég er ekkert viss um að það sé rétt leið, og raunar alls ekki, af því að bankasýsluaðferðin er sú aðferð sem hefur verið notuð í nágrannalöndum okkar við sambærilegar aðstæður, með þessa armslengdarfjarlægð.“

En líður þér eins og verið sé að reyna að koma einhverju á ykkur?

 „Ja, það er ekki alveg laust við það, getum við sagt alla vega.“

Viljið þið eitthvað biðjast afsökunar á einhverju til íslensku þjóðarinnar? 

„Ekki nema þá því að það hafi verið mistök af okkar hálfu, ekki aðeins okkar kannski heldur líka ríkisins og mögulega Íslandsbanka, að kynna ekki hvað var í vændum með mun betri hætti en var gert. Það beindist náttúrulega ekki til almennings, sem það hefði átt að gera,“ segir Lárus Blöndal.