Njarðvík sótti stigin tvö fyrir Vestan

Leikurinn var jafn framan af áður en Njarðvík náði 13 stiga áhlaupi sem kom þeim í 12 stiga forskot, 9-21. Þetta forskot gáfu gestirnir aldrei eftir en Njarðvík vann fyrsta leikhluta 20-29 og bættu um betur með því að vinna annan leikhluta 19-30. Hálfleikstölur voru því 39-59.

Ísfirðingar komu sterkari en áður út í síðari hálfleik en þeim tókst þó einungis að minnka muninn tvívegis niður í 17 stig áður en gestirnir tóku leikinn aftur yfir og dreifðist stigaskorið nokkuð jafnt yfir leikmannahóp Njarðvíkur. Logi Gunnarsson kláraði þriðja fjórðung fyrir gestina með sniðskoti, sem gerði að verkum að þeir leiddu með 30 stigum fyrir loka leikhlutann, 59-89.

Síðasti fjórðungur var bara formsatriði en hann var jafnframt sá jafnasti. Mario Matasovic kastar þó niður þriggja stiga körfu sem nær mestu forystu sem Njarðvík náði í leiknum öllum þegar rúmar þrjár mínútur eru liðnar af fjórða leikhluta, 36 stiga munur í stöðunni 61-97. Heimamenn reyna hvað þeir geta að laga stöðuna en leiknum lýkur með 33 stiga sigri Njarðvíkur, 82-115.

Mario Matasovic var stigahæsti leikmaður leiksins með 26 stig en Mario tók líka 6 fráköst ásamt því að gefa 3 stoðsendingar. Fotis Lampropoulos var framlagshæstur með 35 framlagspunkta en Lampropoulos gerði 21 stig, tók 13 fráköst og gaf 1 stoðsendingu. Marko Jurica var bestur í liði Vestra með 25 stig, 7 fráköst og 1 stoðsendingu, alls 28 framlagspunktar.

Njarðvík styrkir stöðu sína í öðru sæti deildarinnar með sigrinum en núna er liðið aðeins tveimur stigum á eftir toppliði Þórs frá Þorlákshöfn þegar þrír leikir eru eftir. Vestri er eftir sem áður í 11. sæti deildarinnar með 8 stig. Ísfirðingar eru 6 stigum frá öruggu sæti þegar jafnmörg stig eru eftir í pottinum.