Beyglaði svanurinn lifir til­tölu­lega eðli­legu lífi

Það kannast margir við svaninn og hafa orðið hans varir á síðustu árum.

Hér má til dæmis líta tveggja ára gamlan spjallþráð af netinu þar sem fólk veltir fyrir sér hvað hafi komið fyrir fuglinn.

Við kíktum niður að tjörn til að sjá hvort við myndum ekki rekast á hann og viti menn, þarna var hann. Hægt er að horfa á fund okkar við svaninn í fréttinni í spilaranum hér að neðan:

Þegar maður sér greyið kallinn á tjörninni, sem sker sig dáldið úr hópnum frá hinum svönunum, er stutt í ljóð Einars Braga þar sem hann spyr: Hvað veldur sorg þinni sáru, svanur á báru? Okkur skilst þó á fróðum mönnum að þessi undarlegi vöxtur á hálsi hans eigi ekkert að koma niður á daglegu lífi hans. 

„Nei, nei hann virðist geta lifað eðlilegu lífi þannig lagað séð. Eins og ég segi þá er hann búinn að vera þarna í nokkur ár. En lifa eðlilegu lífi jú en ég hef ekki séð hann paraðan eða með unga en hann svona lifir,“ segir Ólafur Nielsen, fuglafræðingur hjá Náttúrufræðistofnun Íslands. 

Ekki efst í goggunarröðinni

Hinum svönunum virðist þannig ekki lítast neitt sérstaklega á þennan bæklaða svan.

Við tókum einmitt eftir því að hann virtist vera dálítið út úr hópnum á Tjörninni.

„Nei, hann er allavega ekki efstur í goggunarröðinni. Það er alveg öruggt,“ segir Ólafur.

En hvers vegna í ósköpunum er hálsinn á svaninum svona undarlegur?

Einhverjir hafa látið sér detta í hug að hann hafi gleypt vinkil. Það útilokar Ólafur.

Gírafagæsin

„Það er líkast því sem hann hafi orðið fyrir slysi. Þá væntanlega í æsku,“ segir hann.

Á Tjörnina eiga heima um hundrað svanir á hverjum vetri. Og í þeim hópi eru reglulega fuglar með bæklaðan háls. Enda er hann nú engin smá smíði.

„Þetta er nú hálslangur fugl og kannski ekki að ósekju að þeir hafa stundum verið kallaðir gírafagæsir. Þeir eru með þennan gríðarlega háls,“ segir Ólafur.