Middlesbrough sló Tottenham úr leik í framlengingu

Middlesbrough gerði sér lítið fyrir og sló Manchester United úr leik í seinustu umferð þar sem liðið hefði betur í vítaspyrnukeppni.

Verkefni kvöldsins var ekki mikið minna og ljóst að erfitt yrði fyrir Middlesbrough að halda aftur að liði Tottenham.

Varnarleikur Middlesbrough var hins vegar til fyrirmyndar og liðið gaf ekki mörg færi á sér. Þegar líða fór á leikinn færðu þeir sig svo framar á völlinn og fengu nokkur góð færi til að stela sigrinum.

Ekki tókst það þó í venjulegum leiktíma því enn var markalaust þegar 90 mínúturnar voru liðnar og því þurfti að framlengja.

Bæði lið fengu sín færi til að koma boltanum í netið og ef eitthvað var voru það liðsmenn Middlesbrough sem virtust hættulegri. Það skilaði sér loksins snemma í síðari hálfleik framlengingarinnar þegar Josh Coburn fékk boltann inn fyrir vörn gestanna og þrumaði honum í netið framhjá Hugo Lloris.

Gestirnir í Tottenham reyndu að sækja jöfnunarmark á lokamínútunum en fundu engar glufur á vörn Middlesbrough. Niðurstaðan varð því 1-0 sgiur heimamanna og þeir verða í pottinum þegar dregið verður í átta liða úrslit FA-bikarsins, á meðan Tottenham situr eftir með sárt ennið.