Fyrrverandi leikmaður United gapandi hissa þegar Messi bað um treyjuna hans

Leikurinn var ekki eftirminnilegur fyrir Gomes enda tapaði Lille honum með fimm mörkum gegn einu. Hann mun samt sennilega ekki gleyma því sem gerðist eftir leikinn í bráð.

Messi skoraði í leiknum, aðeins annað deildarmarkið sitt fyrir PSG. Í leikmannagöngunum eftir leikinn gekk argentínski snillingurinn að Gomes og bað um að skiptast á treyjum við hann.

Gomes var greinilega hissa á beiðninni en sagði að sjálfsögðu ekki nei við Messi. Eftir að hafa skipst á treyjum féllust þeir í faðma.

Lille fékk Gomes frá Manchester United fyrir tveimur árum. Á síðasta tímabili lék hann sem lánsmaður með Boavista í Portúgal og stóð sig vel.

Lille kallaði Gomes svo til baka fyrir þetta tímabil. Í vetur hefur hann leikið átján leiki í öllum keppnum og skorað tvö mörk.