Við vissum að við myndum geta skorað auðveldlega

Breiðablik náði að fylgja stór sigrinum á KR eftir með því að leggja Tindastól á heimavelli fyrr í kvöld í leik sem var hluti af 14. umferð Subway deildar karla. Blikar náðu að spila sinn leik og unnu 107-98 sigur sem að kemur þeim enn nær því að komast í úrslitakeppnina. 

Þjálfari Blika, Pétur Ingvarsson var mjög ánægður með að hafa náð í sigurinn fyrst og fremst þegar hann var spurður að því hvað hann hafi verið ánægðastur með í leik sinna manna.

„Ég er ánægður með sigurinn fyrst og fremst. Kaninn okkar [Samuel Prescott] er ekki með og tveir leikmenn losnuðu úr einangrun bara í hádeginu. Þannig að þetta var smá óvissu leikur því við vissum ekki hvort að honum yrði frestað. Ég er bara mjög ánægður með að hafa náð að klára þetta allir lifandi.“

Blaðamaður var hrifinn af því hvernig Blikar spiluðu varnarleik sinn í kvöld og spurði hvort að þetta væri með betri varnarleikjum sem liðið hans hefur sýnt af sér í vetur.

„Jú jú svo sem. Þeir eru hörkugott hraðaupphlaups lið. Við náum að skora okkar stigafjölda og þá erum við í ágætis málum. Ég hef nú sagt að Valur sé óskilvirkasta sóknarlið deildarinnar en Tindastóll er óskilvirkasta varnarlið deildarinnar þannig að við vissum að við myndum geta skorað auðveldlega. Planið gekk ágætlega upp“, sagði Pétur með bros á vör.

Með sigrinum í kvöld komust Blikar í 12 stig og jafnaði þar með ÍR að stigum í 8. og 9. sæti en með leik til góða á Breiðhyltinga. Þeir eru einnig komnir með innbyrðisviðureignina gegn Tindastól sem eru tveimur stigum fyrir ofan Blika og ÍR. Pétur var því spurður hvort Blikar væru ekki frekar að horfa í úrslitakeppnina en að bjarga sér frá falli.

„Eru ekki allir að horfa á úrslitakeppnina. Ég veit að ÍR og KR eru líka að stefna þangað og Vestri og Þór eru að reyna að narta í hælana á okkur. Þetta er bara hörkudeild og fullt af hörku liðum og við tökum bara einn leik í einu. Við eigum leik við Grindavík á föstudaginn og við verðum að vera tilbúnir í það.“

Að lokum var Pétur spurður út í stöðuna á Samuel Prescott og sagði hann að hann yrði líklega ekki með á móti Grindavík á föstudaginn en hann ætti við vöðvatognun að stríða en hún væri ekki alvarleg.

Subway-deildirnar í körfubolta eru á Stöð 2 Sport en upplýsingar um útsendingar má finna hér. Subway-deildin er hluti af Stöð 2 Sport Ísland sem kostar 3.990 krónur á mánuði.