Skýrsla Henrys: Eitt stærsta íþróttaafrek Íslandssögunnar

Það eru átta lykilleikmenn fjarverandi. Það á eiginlega ekki að vera hægt að vinna Ólympíumeistara Frakka með þennan leikmannahóp. En svona eru íþróttirnar yndislegar.

Á endanum fengu Frakkarnir flengingu. Þá stærstu í EM-sögu þeirra. Þetta er án nokkurs vafa eitt stærsta íþróttaafrek Íslandssögunnar!

Þetta leikplan sem Guðmundur Guðmundsson hefur sett upp er ótrúlegt og verður líklega geymt á safni í framtíðinni. Það er alveg sama hver spilar. Allir blómstra. Ég er nánast farinn að trúa því að það myndi ganga upp með mig á vellinum. Þetta er það skothelt plan.

Hver er þessi Ómar Ingi? sagði fólk og gerði grín að vali á íþróttamanni ársins um áramótin. Í kvöld vita allir hver hann er og af hverju hann var verðskuldað kjörinn íþróttamaður ársins.

Fyrstu 30 mínútur leiksins hjá honum voru einhverjar bestu 30 mínútur landsliðsmanns frá upphafi. Átta mörk, þrjár stoðsendingar og gerði látlaust grín að stórkostlegum varnarmönnum Frakka sem vissu ekki í hvorn fótinn þeir áttu að stíga. Drengurinn er algjörlega ótrúlegur.

Þetta var svo sannarlega kvöld örvhentra því Viggó Kristjánsson var einnig stórkostlegur. Tók seinni hálfleikinn yfir og fullkomnaði niðurlægingu Frakka er hann „greiddi“ franska markverðinum. Unun á að horfa.

Svo fæddist stjarna í líki Viktors Gísla Hallgrímssonar. Eftir að hafa ekki getað neitt gegn Dönum mætti hann á dúkinn í kvöld og át Frakkana. 43 prósent varsla og þvílíkir boltar. Þetta er alvöru karakter.

Talandi um karaktera. Eyjamaðurinn Elliði Snær Viðarsson er algjörlega dásamlegur. Mætti bara og skilaði níu stoppum, tveimur stolnum, einu vörðu skoti og fjórum skoruðum mörkum á milli þess sem hann pirraði Frakkana látlaust. Það er svo gaman að sjá pirraða Frakka. Þvílíkur meistari. Frábær með Ými í vörninni og mikið djöfull held ég að það sé leiðinlegt að spila á móti þeim.

Í dag eru nákvæmlega 15 ár frá líklega best spilaða leik landsliðsins frá upphafi. Hann var gegn Frökkum í Bördelandhalle í Magdeburg. Þar var allt undir og Ísland brilleraði.

Ég var í Magdeburg þetta fræga kvöld árið 2007 og það var ógleymanleg stund. Þar var öll höllin að styðja Ísland þar sem Alfreð Gíslason er kóngurinn i borginni og þeir Ólafur Stefánsson, Sigfús Sigurðsson og Arnór Atlason höfðu allir spilað með liðinu.

Í Búdapest í kvöld gerðist svipaður hlutur því áhorfendur gátu ekki annað en dáðst að íslenska liðinu og hvatt það. Við eyðilögðum veislu Ungverjanna en meira að segja þeir hvöttu íslenska liðið til dáða.

Íslensku áhorfendurnir voru frábærir, þó fáir séu eftir, og náðu höllinni með sér. Það var ítrekuð gæsahúð að sitja þarna og fylgjast með stemningunni sem var öll með Íslandi.

Þetta kvöld í Búdapest er eitt af þessum handboltakvöldum sem íslenska þjóðin mun aldrei gleyma. Rétt eins og leiknum 2007 og leiknum við Spánverja á ÓL 2008. Í kvöld var skrifaður stór og merkur kafli í íslenska handboltasögu. Það voru forréttindi að verða að vitni að þessu.

Þarf Icelandair ekki að athuga að henda í aðra Covid-ferð á EM? Það er nefnilega eitthvað í loftinu.