Arnór Atla: Finnst möguleikarnir í milliriðlinum fínir og hef tröllatrú á liðinu

Ísland fór með tvö stig í milliriðil. Þetta var ljóst eftir sigur á heimaliði Ungverjalands, 31-30, í fyrradag. Í milliriðlinum mætir Ísland Danmörku, Frakklandi, Króatíu og Svartfjallalandi. Fyrsti leikur íslenska liðsins er gegn því danska í kvöld.

Fáir Íslendingar þekkja danska handboltann jafn vel og Arnór. Hann spilaði þar um árabil og er í dag aðstoðarþjálfari Álaborgar auk þess sem hann þjálfar U-20 árs landslið Dana. Arnór var gestur EM-hlaðvarpsins þar sem hann ræddi við Stefán Árna Pálsson, Ásgeir Örn Hallgrímsson og Róbert Gunnarsson um leikinn í kvöld og framhaldið hjá íslenska liðinu.

Lausnin að bakka?

Róbert spurði Arnór meðal annars hvernig hann myndi skipuleggja varnarleik gegn sóknarleik Íslands. 

„Mér finnst rosalega erfitt að plana varnarleik á móti því það geta komið árásir úr öllum stöðum. Aron [Pálmarsson], Gísli [Þorgeir Kristjánsson] og Ómar [Ingi Magnússon] eru allir rosalega góðir maður gegn manni,“ sagði Arnór.

„Út frá leikjunum okkar hingað til höfum við ekki skotið mikið fyrir utan þannig að það væri kannski allt í lagi að vera dálítið passívir á okkur og sjá hvort við myndum skjóta fyrir utan. Svo myndi ég leggja áherslu á að stoppa boltann og ekki leyfa Gísla og Ómari að vinna tvo menn og losa boltann trekk í trekk.“

Engin óskastaða fyrir Møllgaard

Arnór þekkir helsta varnarmann Dana, Henrik Møllgaard, vel en hann leikur með Álaborg. Hann segir að honum líði betur með að verjast stórum og líkamlega sterkum leikmönnum frekar en lágvöxnum og kvikum.

„Það er engin draumastaða fyrir hann að mæta þessum minni, sneggri mönnum. Hann vill frekar hafa þá stóra og þunga. Þar er hann bestur. Ég held að hann hlakki ekkert til að mæta Ómari og Gísla,“ sagði Arnór.

Ekki fengið mikla keppni

Danir hafa eru ekki árennilegir enda unnið alla leiki sína á EM stórt. Fyrir mótið unnu þeir svo Norðmenn með tíu marka mun í vináttulandsleik.

„Þeir hafa verið algjörlega frábærir hingað til en það er kannski heldur ekki gott að hafa ekki farið í neina alvöru spennuleiki. Þeir hafa lítið þurft að hafa fyrir þessu en spilað frábærlega. Að mörgu leyti spila þeir svipaðan sóknarleik og við,“ sagði Arnór.

„Þetta einkennist af mörgum árásum, sérstaklega eftir að þeir fengu [Mathias] Gidsel inn í hægri skyttuna. Þeir [Mads] Mensah, [Jacob] Holm og [Rasmus] Lauge eru allir rosalega góðir maður á mann. Svo er Mikkel [Hansen] þarna til að taka skotin og síðustu sendinguna. Það verður strembið hvað við eigum að gera. Ef við verðum svona framarlega eins og við höfum oft viljað munu þeir örugglega senda Gidsel og Lauge í árásir allan tímann. Það verður áhugavert að sjá hvernig við leysum það.“

Ótrúlega spenntur fyrir þessu

Arnór telur möguleika Íslands í milliriðlinum góða. „Mér finnst möguleikarnir fínir og hef tröllatrú á þessu liði. Sérstaklega þar sem við tókum tvö stig með okkur, erum við í mjög fínni stöðu,“ sagði Arnór.

„Mér finnst við eiga að vinna Svartfellinga. Króatarnir eru mjög vængbrotnir, hafa lent illa í veirunni og svo er [Domagoj] Duvnjak meiddur. Mér finnst við eiga mjög góða möguleika gegn þeim. Svo vitum við allir hvað gerðist fyrir Frakka fyrir mót og þeir hafa líka lent í einhverjum veikindum núna. Það er ákveðnir möguleikar þar líka þannig ég er ótrúlega spenntur fyrir þessu.“

Hlusta má á EM-hlaðvarpið í spilaranum hér fyrir ofan. Spjallið við Arnór hefst á 26:30 og lýkur á 40:30.