Um­sókn Breiviks um reynslu­lausn tekin fyrir í dag

Íþróttasalur fangelsisins verður nýttur sem réttarsalur næstu daga, en Breivik afplánar dóminn í einangrun og hefur því lítið sem ekkert samneyti við aðra fanga.

Eftir að Breivik mætti inn í íþróttasalinn heilsaði hann að nasistasið og sneri sér að fjölmiðlamönnum. Hann var sömuleiðis með miða með skilaboðum fastan á jakka sínum og áletrun á tösku sinni.

21 árs fangelsi

Breivik var árið 2012 dæmdur í 21 árs fangelsisvist fyrir að myrða 77 manneskjur í sprengingu í Osló og skotárás í Útey. Þó er hægt að framlengja fangelsisvistina þannig að hann sitji inni það sem eftir er ævinnar. Þegar dómur var kveðinn upp kom fram að hann gæti í fyrsta lagi sótt um reynslulausn að tíu árum liðnum.

Eftir að réttarhöld voru sett í morgun spurði verjandi Breiviks, Øystein Storrvik, hvort hægt væri að notast við gamla nafn skjólstæðings síns, Anders Behring Breivik, í stað þess nafns sem hann tók upp fyrir nokkrum árum, Fjotolf Hansen. Saksóknarar höfðu ekkert á móti því.

Fram á fimmtudag eða föstudag

Saksóknarinn í málinu, Hulda Karlsdóttir, flutti svo sína upphafsræðu þar sem hún rökstuddi ástæður þess að ekki væri rétt að veita Breivik reynslulausn.

Reiknað er með að réttarhöldin standi fram á fimmtudag eða mögulega föstudag.