Fundu peninga á síðustu stundu og geta mætt Íslandi

Handboltamiðillinn Handball World fjallaði um það um síðustu mánaðamót að Litháen yrði mögulega ekki með á EM í janúar vegna þess að handknattleikssambandi þjóðarinnar hefði ekki tekist að greiða mótsgjaldið til EHF.

Haft var eftir fyrrverandi framkvæmdastjóra litháíska sambandsins að það væri enn að burðast með skuldir frá þátttöku sinni á HM og EM fyrir meira en tveimur áratugum.

Nú hefur norski miðillinn Nettavisen hins vegar eftir EHF að búið sé að greiða mótsgjaldið og fjármagna ferð Litháens til Íslands og á EM í kjölfarið. Áður var sá möguleiki fyrir hendi að Norðmenn fengju nýtt lið í sinn riðil á EM, í stað Litháens.

Á heimasíðu handknattleikssambands Litháens má sjá að í þessum mánuði var gerður styrktarsamningur við veðmálafyrirtæki sem og samstarfssamningur við helstu íþróttaútvarpsrás landsins.

Ísland og Litháen mætast í vináttulandsleikjum hér á landi 7. og 9. janúar, áður en haldið verður á EM.

Ísland mætir Portúgal 14. janúar, Hollandi 16. janúar og Ungverjalandi 18. janúar. Tvö efstu liðin í riðlinum komast áfram í milliriðil sem verður einnig leikinn í Búdapest.