Hákon út úr EM-hópnum með slitið krossband

Hákon Daði meiddist á æfingu með liði sínu Gummersbach í Þýskalandi á föstudaginn. Bróðir hans, Andri Heimir Friðriksson, greindi frá þessu í hlaðvarpsþættinum Leikhléinu.

Andri segir Hákon hafa farið í sneiðmyndatöku síðar um daginn og sennilega slitið fremra krossband í hné.

„Læknirinn sagði að það væri líklegast slitið, eða mjög illa rifið. Þetta eru 6-9 mánuðir af endurhæfingu,“ segir Andri í þættinum.

Hákon kom til Gummersbach frá ÍBV í sumar og skrifaði í síðasta mánuði undir nýjan samning sem gildir til ársins 2024.

Andri fullyrti jafnframt að til hefði staðið að Hákon yrði í 20 manna EM-hópi Íslands. Nú verður Guðmundur að velja annan kost.

Ljóst er að Bjarki Már Elísson verður í EM-hópnum en aðrir vinstri hornamenn sem til greina koma nú eru Orri Freyr Þorkelsson úr Elverum og Valsarinn Vignir Stefánsson.