Væri glap­ræði að létta á sótt­varna­að­gerðum núna

„Við erum að mjakast hægt og rólega niður. Þetta er í jafnvægi en það má ekki mikið út af bregða til að við fáum „góða“ hópsýkingu og þá færi þetta allt upp. Við vonumst auðvitað til að þetta fari niður. Við þurfum ná þessu niður í svona fimmtíu til sextíu [smit á dag] til að geta létt þrýstingnum verulega á kerfinu og spítalakerfinu sérstaklega.“

Þetta kom fram í máli Þórólfs í spjalli hans við umsjónarmenn Bítisins á Bylgunni í morgun. Hann segir stöðuna vera svipaða nú og var fyrir helgi. „Mjakast hægt og bítandi niður. Þetta voru að meðaltali hundrað á dag um helgina sýnist mér. Það á eftir að gera þetta betur upp.“

Faglegar forsendur

Sóttvarnalæknir ræddi einnig að það gætu verið komnar faglegar forsendur fyrir því að þríbólusettir fái að sleppa við hraðpróf sem nú séu nauðsynleg að fara í til að sækja fjölmenna viðburði. 

„Ég er þó ekkert að leggja það sérstaklega til. Ég er bara benda á ákveðna faglega þætti í þessu og síðan er það stjórnvalda að taka ákvörðun um hvort það verði gert eða ekki. Ég á ekki von á að ég leggi það beinhart til en ég get bent þeim á það og faglegu rökin fyrir því.“

Þrjátíu ómíkrontilfelli

Sóttvarnalæknir segir að upp séu komin um þrjátíu ómíkrontilfelli hér landi sem hafa fengist staðfest með raðgreiningu. „Þetta tengist landamærum og fyrri smitum þannig að það má búast við að við fáum einhverja aukningu hér innanlands eins og aðrir reyndar. En vel að merkja hafa aðrir ekki verið með aðgerðir, sýnatöku á landamærunum, til þessa sem nær stórum hluta frá. En það er alltaf eitthvað sem fer í gegn, við vitum það, og við eigum eftir að fá fleiri slík tilfelli.“

Hann segir flestir vera sammála um það að þetta nýja afbrigði, ómíkron, sé svolítið smitandi, meira heldur en deltaafbrigðið.

„Varðandi einkennin þá eru ekki komin fram ennþá einhver alvarleg einkenni, en það á bara eftir að koma betur í ljós. Menn geta sáralítið fullyrt endanlega um það þar sem þetta er byrja. Segjum sem svo að það sé bara eitt prósent af þeim sem veikjast sem fá alvarleg einkenni, þá tekur smá tíma að sjá það. Við erum núna með tvö prósent af deltaafbrigðinu sem þarf að leggjast inn á spítala, í svona bólusettu samfélagi eins og okkar. Ef ómíkronafbrigðið veldur kannski alvarlegum veikindum og spítalainnlögnum hjá þó það væri kannski ekki nema hjá hálfu prósenti af þeim sem að veikjast, útbreiðslan yrði kannski tvisvar sinnum, þrisvar sinnum meiri en hjá delta, þá erum við bara nokkurn veginn í sömu sporum. Við þurfum aðeins að sjá betur og menn eru að fullyrða ýmislegt. Ég veit ekki heldur hversu rétt er haft eftir mönnum í fyrsta lagi og svo held ég að menn þurfi að passa sig að taka ekki of stórt upp í sig í byrjun.“

Hvatning til að fara í bólusetningu

Þórólfur segir rannsóknir frá Bretlandi bendi til að tvær sprautur virki ekki mjög vel gegn ómíkronafbrigðinu, en að örvunarsbólusetningin virki mjög vel. Þó sé von sé á frekari rannsóknum. 

„Þetta ætti samt að vera hvatning fyrir okkur að fara í bólusetningu og þiggja örvunarskammtinn sem virkar þá mjög vel gegn delta og líka, að því er virðist, gegn ómíkron. Við höfum heldur ekki upp á neitt annað að bjóða.“

Einhver hundruð greinst í hraðprófum

Þórólfur segir að nokkur fjöldi hafi greinst einkennalaus með Covid-19 eftir að hafa farið í hraðpróf. 

„Jújú, það hefur komið upp. Það eru einhver hundruð sem hafa greinst þannig. Ég er ekki með nákvæma tölu yfir það enda erum við bara bara með upplýsingar um þá sem greinast jákvæðir í hraðprófum og fara svo í PCR-staðfestingarpróf. Við erum ekki með aðrar upplýsingar. Það eru einhver hundruð sem eru þar undir.“

Ekki farinn að sjá fyrir endann á faraldrinum

Aðspurður um hvort hann sé farinn að sjá fyrir endann á þessu faraldri segir Þórólfur: „Ekki fullkomlega. Ég geri það ekki. Jújú, það eru allir þreyttir á þessu. Það er ósköp eðlilegt. Maður verður að spyrja sig: Hvað annað er í stöðunni? Hvaða möguleikar eru í stöðunni? Þó maður sé þreyttur þá er ekki nóg að hætta bara öllu. Þá fær maður bara eitthvað annað verra yfir sig. Við erum bara í nokkuð góðum málum hér myndi ég segja. Við erum að ná kúrfunni hægt niður, hún er á fljúgandi ferð upp í nálægum löndum og menn eru með álíka harðar aðgerðir, eða harðari aðgerðir en við. Og spítalarnir í nálægum löndum eru í vandræðum, miklu meiri en við á mörgum stöðum. Ef við viljum vera að bera okkur saman við aðra held ég að við getum nokkuð vel við unað. Það ætti að vera okkar markmið að halda þessu á þessum nótum og reyna að ná kúrfunni aðeins meira niður.“