Strákarnir endurnýja kynnin við Svía eftir tap gegn Portúgal

Ísland mætir Svíþjóð í leiknum um 7. sætið en Svíar töpuðu fyrir Danmörku fyrr í dag, 34-29. Ísland og Svíþjóð endurnýja því kynnin en liðin mættust einnig í milliriðli þar sem Svíar unnu eftir hörkuleik, 29-27.

Í leiknum í dag náðu Portúgalar yfirhöndinni um miðjan fyrri hálfleik og þeir voru fjórum mörkum yfir í hléi, 17-13. Mestur varð munurinn átta mörk í seinni hálfleik en íslensku strákarnir náðu að laga stöðuna á lokakaflanum.

Símon Michael Guðjónsson var markahæstur í íslenska liðinu með 9 mörk, Arnór Viðarsson skoraði 7 mörk og Guðmundur Bragi Ástþórsson 5 mörk.

Leikur Íslands og Svía fer fram á sunnudagsmorgun. Síðar sama dag verða Evrópumeistarar krýndir en í undanúrslitunum í dag mætast annars vegar Þýskaland og Spánn, og hins vegar Króatía og Slóvenía.