Vilja ekki sjá neina græðgi á grágæsaveiðum

Í tilkynningu frá stofnuninni segir að Heiðagæsastofninn standi sem fyrr mjög sterkur. Hann hafi talið um hálfa milljón fugla samkvæmt talningum ársins 2019.

Íslenski grágæsastofninn náði hins vegar hámarki árið 2011 með 112 þúsund fuglum. Síðan þá hefur grágæs fækkað og bentu talningar ársins 2019 til þess stofninn væri kominn niður í 73 þúsund fugla. Árið 2018 voru einungis taldar rúmlega 58 þúsund grágæsir í nóvembertalningum.

„Ekki er alveg ljóst hvað veldur þessari fækkun á grágæs, en til að varpa ljósi á málið hefur Ísland tekið höndum saman við nágranna okkar á Bretlandseyjum með aukinni vöktun og nánara samstarfi. Á vormánuðum náðist samkomulag um merkingarátak sem mun vonandi veita frekari upplýsingar,“ segir í tilkynningunni.

Í þessu ljósi vill Umhverfisstofnun eindregið hvetja veiðimenn til að gæta hófs við grágæsaveiðar og þannig tryggja viðkomu stofnsins til framtíðar.