Aldrei verið skorað eins snemma

Mark Shaw kom eftir aðeins eina mínútu og 57 sekúndur. England fór þá upp hægri kantinn þar sem Kieran Trippier fékk mikinn tíma á boltann, gaf hann fyrir á fjærstöngina þar sem Shaw var einn og óvaldaður og afgreiddi boltann viðstöðulaust í stöng og inn í nærhornið.

Shaw skoraði þar með sitt fyrsta landsliðsmark fyrir England. Aldrei hefur verið skorað eins snemma í úrslitaleik á EM.

Fátt markvert gerðist í fyrri hálfleiknum eftir mark Shaw og var skot hans í markinu eina marktilraun þeirra ensku í fyrri hálfleiknum.

Þeir ensku hafa legið aftarlega og gefið fá færi á sér á meðan þeir ítölsku hafa einnig varist vel, ofar á vellinum, sem hefur gefið enska liðinu fá tækifæri til að sækja að marki þeirra.