Hafnaði Spáni og varð heimsmeistari en mun aldrei skilja af hverju pabbi fór

Hernandez og Griezmann verða eflaust í sviðsljósinu í kvöld þegar stórleikur Frakka og Þjóðverja hefst kl. 19, á Evrópumótinu. Frakkar rétt misstu af Evrópumeistaratitlinum árið 2016 en þá var Hernandez ekki kominn inn í myndina, og enn að velta því fyrir sér hvort hann myndi spila með franska eða spænska landsliðinu.

Hernandez er fæddur í Frakklandi og lék með yngri landsliðum Frakka en í grein um hann á vef The Guardian segir að hann hafi lengi talið sig „meira spænskan en franskan“. Hernandez ólst nefnilega upp á Spáni þar sem faðir hans, Jean-Francois, lauk ferli sínum sem knattspyrnumaður.

Pabbinn stakk svo af um miðja nótt, búinn að steypa fjölskyldunni í skuldir. Lucas var þá sjö ára og þeir Theo, litli bróðir hans sem er leikmaður AC Milan í dag, fengu því sitt uppeldi alfarið hjá mömmu sinni, Laurence, og foreldrum hennar.

Ekki hægt að bæta fyrir það sem hann gerði

Lucas eignaðist sjálfur sinn fyrsta son, Martin, tveimur vikum eftir að hafa orðið heimsmeistari í Rússlandi. Eftir að hafa sjálfur orðið faðir á Lucas enn erfiðara með að skilja ákvörðun pabba síns:

„Það mikilvægasta í mínu lífi er sonur minn. Ég geri allt fyrir hann. Ég hef aldrei skilið og mun aldrei skilið hvernig minn [faðir] gat yfirgefið okkur; mömmu mína, mig og Theo litla bróður. Það veit enginn neitt um hann. Ef að hann myndi einn daginn snúa aftur og vilja hitta mig þá myndi ég samþykkja það. Ef hann vill útskýra ákvörðun sína og svo fara, ekkert mál. Líffræðilega þá er hann pabbi minn en ég mun aldrei líta þannig á hann. Það er ekki hægt að bæta fyrir það sem hann gerði,“ sagði Hernandez.

Hernandez vakti snemma athygli útsendara Atlético Madrid sem fengu hann inn í akademíu félagsins. Hjá Atlético hóf Hernandez svo ferilinn, undir handleiðslu Diego Simeone, og lærði hvernig á að verjast.

Stóð til boða að spila fyrir Spán

Hjá Bayern hefur Hernandez átt erfiðara með að festa sig í sessi, hjá liði þar sem ríkari krafa er um sóknarhæfileika og eitt stykki Alphonso Davies er til staðar. Hann hefur hins vegar átt fast sæti í sterkasta byrjunarliði Frakka frá því að hann fékk símtal frá Didier Deschamps landsliðsþjálfara, þremur mánuðum fyrir HM.

Julen Lopetegui, fyrrverandi landsliðsþjálfari Spánar, reyndi að fá Hernandez í spænska landsliðið og Hernandez gat vel hugsað sér að spila fyrir Spán. Eftir samræður við Griezmann, sem var liðsfélagi hans hjá Atlético, og Deschamps var hins vegar ekki aftur snúið og Frakkar hafa svo sannarlega notið góðs af því.

EM 2020 verður sýnt á Stöð 2 Sport EM 2020 sem er hluti af Sportpakkanum, Stóra pakkanum og Risapakkanum. EM 2020 verður einnig hægt að kaupa stakt á kr. 6.990 en fyrir viðskiptavini með aðra áskrift en ofangreindar frá Stöð 2 kostar áskriftin kr. 3.990.