Foden fékk sér Gazza-greiðslu fyrir EM

Gascoigne skartaði aflituðu hári á EM á Englandi 1996 þar sem heimamenn fóru í undanúrslit. Englendingar eru nú aftur á heimavelli, allavega í riðlakeppninni, og eins og 1996 verður einn með aflitað hár í enska hópnum.

Foden skellti sér til rakara í gær og lét aflita á sér hárið. Hann var reyndar ekki fæddur þegar EM fór fram á Englandi 1996 en hefur eflaust séð mark Gascoignes gegn Skotlandi og fleiri eftirminnileg atvik á mótinu oftar en einu sinni.

Hinn 21 árs Foden er ein helsta vonarstjarna Englendinga. Hann átti afar gott tímabil með Manchester City í vetur og var valinn besti ungi leikmaður ensku úrvalsdeildarinnar.

Foden hefur leikið sex A-landsleiki og skorað tvö mörk. Þau komu bæði gegn Íslandi í Þjóðadeildinni í fyrra.

England hefur leik á EM á sunnudaginn þegar liðið mætir Króatíu á Wembley. Auk þeirra eru Skotland og Tékkland í D-riðli mótsins.

EM 2020 verður sýnt á Stöð 2 Sport EM 2020 sem er hluti af Sportpakkanum, Stóra pakkanum og Risapakkanum. EM 2020 verður einnig hægt að kaupa stakt á kr. 6.990 en fyrir viðskiptavini með aðra áskrift en ofangreindar frá Stöð 2 kostar áskriftin kr. 3.990.