NBA dagsins: Ofurmennsk frammistaða hjá Lillard

Lillard skoraði 55 stig þegar Portland tapaði fyrir Denver, 147-140, í tvíframlengdum leik. Hann setti niður tólf þriggja stiga skot sem er met í úrslitakeppninni. Gamla metið voru ellefu þristar sem Klay Thompson skoraði fyrir Golden State Warriors gegn Oklahoma City Thunder í úrslitum Vesturdeildarinnar 2016.

Lillard jafnaði metin í 121-121 og tryggði Portland framlengingu þegar hann setti niður þrist þegar 3,7 sekúndur voru eftir af venjulegum leiktíma. Hann tryggði Portland svo aðra framlengingu með öðrum þristi þegar 6,6 sekúndur voru eftir af fyrri framlengingunni.

Lillard hitti úr sautján af 24 skotum sínum í leiknum, þar af tólf af sautján fyrir utan þriggja stiga línuna, og skoraði níu stig af vítalínunni. Hann tók einnig sex fráköst og gaf tíu stoðsendingar.

„Þetta var besta frammistaða í úrslitakeppni sem ég hef séð. Hann gaf allt í leikinn,“ sagði Terry Stotts, þjálfari Portland. „Damian Lillard var ofurmennskur,“ sagði kollegi hans hjá Denver, Michael Malone.

Nikola Jokic átti einnig stórleik fyrir Denver en serbneski miðherjinn skoraði 38 stig, tók ellefu fráköst og gaf níu stoðsendingar.

Michael Porter skoraði 26 stig, þar á meðal sigurkörfu Denver eftir sendingu frá Jokic. Porter tók einnig tólf fráköst. Monte Morris skoraði 28 stig af bekknum og Austin Rivers var með átján stig og sjö stoðsendingar.

Denver er 3-2 yfir í einvíginu og getur tryggt sér sæti í undanúrslitum Vesturdeildarinnar með sigri í Portland aðfaranótt föstudags.

Í spilaranum hér fyrir neðan má sjá brot úr leik Denver og Portland og leikjum Phoenix Suns og Los Angeles Lakers og Brooklyn Nets og Boston Celtics auk flottustu tilþrifa leikja næturinnar.

NBA er á Stöð 2 Sport en upplýsingar um útsendingar má finna hér. NBA körfuboltinn er hluti af Stöð 2 Sport erlent sem kostar 3.990 krónur á mánuði en einnig má kaupa útsendingar sem stakan viðburð á 990 krónur.