„Þykir auðvitað vænt um þær innst inni en þegar leikurinn er í gangi þá gleymum við því“

Helena og stöllur hennar í Val voru 18-2 eftir þennan fyrsta leikhluta og unnu leikinn að lokum af öryggi, 58-45.

„Við ætluðum að koma af krafti inn í leikinn og mér fannst við gera það vel. Við vissum samt að þær myndu koma til baka eftir því sem liði á leikinn en mér fannst við heilt yfir spila mjög góða vörn. Skorið var lágt og baráttan mikil, svo þetta var bara stuð,“ sagði Helena. En skynjaði hún mikið óöryggi í sínu gamla liði í þessum magnaða fyrsta leikhluta, ekki síst er leið á hann?

„Verðum við ekki að gefa okkur „credit“ fyrir að hafa komið út í leikinn af svona krafti? Við gerðum það ekki í síðustu tveimur leikjum á móti Fjölni [í undanúrslitum]. Við byrjuðum flatar þar. Núna er maður strax farinn að hugsa um næsta leik. Við ætlum aftur að koma út í þann leik af fullum krafti og ekki leyfa þeim að fara af stað,“ sagði Helena.

„Haukarnir eru með frábært lið og þessi fyrsti leikhluti var ekkert eðlilegur. Ég veit að þær koma dýrvitlausar í leikinn á sunnudaginn og vilja bæta upp fyrir þetta. Við vissum að þetta yrði mikil líkamleg barátta og ég er strax orðin spennt að spila aftur,“ bætti hún við.

Helena er uppalin í Haukum og varð Íslandsmeistari með liðinu árið 2018 áður en hún skipti yfir til Vals þar sem hún varð svo Íslandsmeistari ári síðar. Er það enn sérstakt að mæta á Ásvelli þar sem hún hefur varið svo mörgum stundum?

„Ég bý þarna við hliðina á, svo það er stutt að fara. Auðvitað ber ég sterkar taugar til þeirra því þarna er fullt af stelpum sem ég hef alist upp við að spila með eða þjálfa. Mér þykir auðvitað vænt um þær innst inni en þegar leikurinn er í gangi þá gleymum við því bara,“ sagði Helena brosandi.