KA bæði með fleiri stig og fleiri mörk en þegar liðið varð Íslandsmeistari 1989

KA-menn eru eitt af fjórum liðum í Pepsi Max deild karla sem hafa náð í tíu stig í fyrstu fjórum umferðunum.

KA liðið er bæði með 10 stig og 10 mörk eftir fyrstu fjóra leikina og hefur aldrei áður byrjað Íslandsmótið svona vel.

Það vekur ekki síður athygli að KA-menn hafa ekki enn spilað á sínum eigin heimavelli því þrír af fyrstu fjórum leikjunum hafa verið á útivelli og sá fjórði, eini heimaleikur liðsins, var spilaður á Dalvík þar sem Akureyrarvöllur er ekki leikfær.

Það er ljóst að þessi byrjun KA-liðsins er söguleg fyrir Akureyrarfélagið.

KA byrjaði ekki einu sinni svona vel sumarið 1989 þegar félagið varð Íslandsmeistari í fyrsta og eina skiptið.

KA-menn fengu átta stig og skoruðu sjö mörk í fyrstu fjórum leikjum sínum á Íslandsmeistaraárinu fyrir 32 árum síðan.

KA gerði markalaust jafntefli í fyrsta leik sínum í Kórnum en hefur unnið þrjá leiki í röð síðan að liðið komst aftur út.

KA vann 3-1 sigur á KR á KR-vellinum, 3-0 sigur á Leikni R. á Dalvíkurvelli og loks 4-1 útisigur á Keflavík í HS Orku vellinum í fyrrakvöld.

Af þessum tíu mörkum þá hefur Hallgrímur Mar Steingrímsson skorað fimm mörk sjálfur og lagt upp önnur þrjú til viðbótar.

Þessi byrjun er þó ekki einsdæmi á Akureyri því Þórsarar fengu líka tíu stig út úr fyrstu fjórum leikjum sínum sumarið 1992 en þeir voru þá nýliðar í deildinni og enduðu í þriðja sæti um haustið. Eina stigið sem Þórsarar töpuðu í upphafi mótsins 1992 var einmitt í 2-2 jafntefli í nágrannaslag á móti KA.