Meint klám­högg Brynjars og meintur grátur Guð­mundar

Pistill þingmannsins Brynjars Níelssonar, sem birtist á Vísi í gær, hefur vakið mikil viðbrögð. Pistillinn fjallar um Samherja og mál sem tengjast sjávarútvegsfyrirtækinu. En hefur á samfélagsmiðlum einkum hverfst um dæmi sem Brynjar tók til að undirstrika þá skoðun sína að forsenda velferðarkerfisins væri öflugt atvinnulíf. 

Brynjar sagði, en Bubbi Morthens hefur verið meðal þeirra sem gagnrýnt hefur framgöngu Samherja í málum sem snúa að fréttaflutningi Ríkisútvarpsins og Helga Seljan af fyrirtækinu, að heiðurslaun væru til að mynda óhugsandi án Samherja og annarra sambærilegra fyrirtækja. 

Segja má að ummælin hafi kallað fram holskefla svívirðinga sem gengið yfir Brynjar í gær og í dag á samfélagsmiðlum og í athugasemdakerfi Vísis.

Einn þeirra fjölmörgu sem hefur gert þessi ummæli að umtalsefni er þingmaður Samfylkingarinnar, Guðmundur Andri Thorsson, en honum þykir Brynjar vera að höggva þar sem síst skyldi. 

„Hvernig blammerar maður Bubba Morthens? Hvaða spæling nær honum? Hugs hugs. Jú! Að hann sé á listmannalaunum! Landeyða. Letingi. Á framfæri dugnaðarforka eins og Samherjafrænda sem hamist við að draga björg í bú svo að hann geti leikið sér,“ skrifaði Guðmundur Andri háðskur í gær á Facebook-síðu sína. Og bætir þá við: „Eða kannski ekki.“

Ef Bubbi væri Samherji

Greinilegt er að þetta útspil Brynjars stendur í Guðmundi Andra því í dag hélt hann áfram að velta upp flötum á málinu:

„Hið geysi-misheppnaða klámhögg Brynjars Níelssonar í áttina að dugnaðarforkinum og verðmætaskaparanum Bubba Morthens hefur vakið athygli, og svo sem ekki margt um það að segja. 

En ímyndum okkur að í tónlistinni ríkti svipað fyrirkomulag og Brynjar er svo hrifinn af í sjávarútvegi,“ skrifar Guðmundur Andri á Facebooksíðu sína.

Þingmaðurinn segir að þá hefði Bubbi fengið á sínum tíma ókeypis kvótaúthlutun á útgáfu ósaminnar tónlistar á grundvelli fyrri afkasta. Og hefði síðan haldið áfram að safna til sín slíkum heimildum með þeim afleiðingum að hann og aðilar tengdir honum hefði nú yfirburðastöðu í íslenskri tónlist.

„Það hefur hann að vísu í núverandi fyrirkomulagi, en væri hér kvótakerfi í tónlist með framseljanlegum sönglagaheimildum myndi nýr listamaður þurfa að kaupa af honum – og öðrum risum – slíka heimild til að gefa út lögin sín ...“

„Ástæðan fyrir því að þjóðin getur bæði borgað okkur og Bubba laun“

Brynjar gefur ekki mikið fyrir þetta dæmi Guðmundar Andra í svari og ljóst er að hann telur útúrsnúninga á orðum sínum ráðandi í öllum viðbrögðum.:

„Voðalegur grátur er þetta út af engu, Guðmundur Andri. Þessi færsla mín var ekki um Bubba. Bætti var bara við þeirri skoðun minni að heiðurslaun til æviloka er ekki gott kerfi til að styðja við listir og menningu,“ segir Brynjar og telur vert að árétta efni pistils síns:

„Ágætt væri bæði fyrir þig og Bubba að vita að velferð þjóðar fer eftir því hvað við getum selt útlendingum en ekki á því hvaða poppstjarna er vinsælust á hverjum tíma. Það er ástæðan fyrir því að þjóðin getur bæði borgað okkur og Bubba laun.“

Brynjar gerir svo betur grein fyrir máli sínu á Facebooksíðu sinni þar sem hann segist alls ekki hafa verið að ráðast á poppgoðið.