Í beinni: MK og MH berjast um sæti í úrslitaleik Framhaldsskólaleikanna

Ingvi Þór Sæmundsson skrifar 8. apríl 2021 18:30

Kristján Einar Kristjánsson, Egill Ploder, Króli og Donna Cruz sjá um umfjöllun frá Framhaldsskólaleikunum í rafíþróttum.

Seinni undanúrslitaviðureign Framhaldsskólaleikanna í rafíþróttum fer fram í kvöld. Þá mætast Menntaskólinn í Kópavogi og Menntaskólinn við Hamrahlíð.

Sigurvegarinn mætir Tækniskólanum í úrslitaleiknum sem fer fram eftir viku. Tækniskólinn sigraði Verslunarskóla Íslands í fyrri undanúrslitaviðureigninni.

Keppt verður í þremur tölvuleikjum: FIFA 21, Rocket League og CS:GO. Til að komast í úrslit þarf lið að fá tvö stig, eða með öðrum orðum að vinna tvær af þremur viðureignum.

Í skotleiknum CS:GO eru fimm saman í liði, í fótboltakappakstursleiknum Rocket League þrír saman í liði og í fótboltaleiknum FIFA 21 eru tveir saman í liði.

Í undankeppninni fékk MH samtals nítján stig en MK fimmtán.

Bein útsending frá viðureign MK og MH hefst klukkan 18:30 á Stöð 2 eSport. Kristján Einar Kristjánsson lýsir og þau Egill Ploder, Króli og Donna Cruz verða sérfræðingar.

Einnig má fylgjast með í beinni útsendingu á Twitch-síðu leikanna hér að neðan.

Rafíþróttir Framhaldsskólaleikarnir