Naumur sigur Bucks og fjöldi stór­sigra í nótt

Gríska undrið, Giannis Antetokounmpo, var ekki með Bucks í nótt og lenti liðið í vandræðum með Sacramento Kings. Gestirnir frá Milwaukee voru hænuskrefi á undan í fyrri hálfleik en um miðjan þriðja leikhluta jafnaði Sacramento leikinn í stöðunni 81-81. Gestirnir gáfu í eftir það og voru komnir 11 stigum yfir um miðbik fjórða leikhluta, staðan þá 116-105 Bucks í vil.

Leikmenn Kings neituðu að gefast upp og var staðan jöfn 119-119 þegar tvær mínútur lifðu leiks. Jrue Holiday steig upp í fjarveru Giannis og sá til þess að Bucks lönduðu eins stigs sigri, lokatölur 129-128. Hann skoraði 33 stig, gaf 11 stoðsendingar og tók sjö fráköst. Brook Lopez kom þar á eftir með 26 stig. Hjá Kings voru De‘Aaron Fox og Terence Davis báðir með 27 stig.

Dallas Mavericks fór illa með Washington Wizards, lokatölur 109-87. Russell Westbrook skoraði 26 af 87 stigum Wizards í leiknum ásamt því að taka 14 fráköst. Luka Dončić var með 26 stig í liði Dallas sem og átta fráköst og sex stoðsendingar. Boban Marjanović var með tvöfalda tvennu en hann skoraði 15 stig og tók 12 fráköst.

New York Knicks rúllaði yfir Detroit Pistons, 125-81. Julius Randle skoraði 29 stig í liði Knicks ásamt því að taka átta fráköst og Reggie Bullock skoraði 22 stig. Hjá Pistons var Jerami Grant stigahæstur með 16 stig.

Portland Trail Blazers fór álíka illa með Oklahoma City Thunder, lokatölur þar 133-85. Damian Lillard var rólegur í liði Portland að þessu sinni með „aðeins“ 16 stig. Stigahæstur var CJ McCollum með 20 stig en alls skoruðu átta leikmenn liðsins tíu stig eða meira. Enes Kanter endaði með tvöfalda tvennu, 12 stig og 17 fráköst.

Hjá Oklahoma var Kenrich Williams stigahæstur með 18 stig.

Besta lið deildarinnar um þessar mundir, Utah Jazz, ákvað að vera með og lagði Orlando Magic með 46 stiga mun, lokatölur 137-91. Donovan Mitchell skoraði 22 stig á aðeins 21 mínútu. Þar á eftir komu Bojan Bogdanović og Joe Ingles, báðir með 17 stig.

Hjá Magic var Wendell Carter r. stigahæstur með 19 stig en hann tók einnig 12 fráköst.

Joel Embiid sneri aftur á völlinn með Philadelphia 76ers eftir meiðsli. Hann skoraði 24 stig og tók átta fráköst í 122-113 sigri 76ers á Minnesota Timberwolves.

Þá vann Miami Heat góðan 14 stiga sigur á Cleveland Cavaliers, 115-101 og Indiana Pacers vann San Antonio Spurs í framlengdum leik, 139-133.

Hér má sjá stöðuna í bæði Austur- og Vesturdeildinni. Þá er vert að minna á að Chicago Bulls og Brooklyn Nets mætast klukkan 18.00 í dag, í beinni útsendingu á Stöð 2 Sport.

NBA er á Stöð 2 Sport en upplýsingar um útsendingar má finna hér. NBA körfuboltinn er hluti af Stöð 2 Sport erlent sem kostar 3.990 krónur á mánuði en einnig má kaupa útsendingar sem stakan viðburð á 990 krónur.