„Mögulega vísbending um að búið sé að ná utan um þetta“

Auk þeirra sem greindust innanlands greindust tveir á landamærunum og er beðið mótefnamælingar. 

Rögnvaldur Ólafsson, aðstoðaryfirlögregluþjónn almannavarna segir að vísbendingar séu um að búið sé að ná tökum á stöðunni þó of snemmt sé að fullyrða um slíkt.

„Þetta eru enn sem komið er jákvæðar fréttir. Fjöldinn er auðvitað ekki jákvæður en að það skuli allir vera í sóttkví eru jákvæð skilaboð. Það er mögulega vísbending um að búið sé að ná utan um þetta en það er enn of snemmt að segja til um hvað þetta þýðir fyrir lengri tíma, en sannarlega jákvætt,“ sagði Rögnvaldur.

Eru smitin enn öll bundin við höfuðborgarsvæðið?

„Eftir því sem ég kemst næst er þetta enn sem komið er allt á höfuðborgarsvæðinu.“

Rögnvaldur fór sjálfur í vettvangsferð að gosstöðvum í gær, þar sem nokkuð hefur verið um hópamyndanir síðustu daga.

„Það var töluvert af fólki þarna og í hópum en maður sá að tengdir hópar voru saman og bil á milli hópa sem sátu þarna í brekkunni.“

Búist er við því að framleiðslugeta bóluefnaframleiðanda í Evrópu aukist á næstunni með opnun nýrra framleiðslustaða. Það mun skila sér í hraðari afhendingu bóluefna í álfunni samkvæmt tilkynningu frá Lyfjastofnun Íslands og heilbrigðisráðuneytinu.

Í gær voru fjögur þúsund og fjögur hundruð manns fædd árin 1946-1949 bólusett á vegum Heilsugæslunnar og mættu átta af hverjum tíu sem boðaðir voru.