Ekki svo gamall liðsfélagi var Lakers liðinu erfiður í enn einu tapinu

Danny Green hitti úr átta þriggja stiga skotum og var með 28 stig á móti sínu gamla liði þegar Philadelphia 76ers vann Los Angeles Lakers 109-101. Þetta var fjórða tap Lakers liðsins í röð.

Seth Curry skoraði 19 stig fyrir 76ers og Tobias Harris var með 17 stig fyrir efsta liðið í Austurdeildinni. Sixers liðið hefur unnið tíu af síðustu ellefu leikjum þar af sjö af átta leikjum síðan liðið missti stjörnuleikmanninn Joel Embiid í meiðsli.

Danny Green varð meistari með Lakers í fyrra en var þá bara með 8,0 stig í leik. Hann skoraði sex þrista í fyrstu tveimur og hálfum leikhluta í gær eftir að hafa fengið meistarahringinn sinn afhentan fyrir leikinn. Dwight Howard fékk líka sinn hring en var síðan hent út úr húsi í fyrsta leikhluta.

De'Aaron Fox skoraði 44 stig þegar Sacramento Kings vann Golden State Warriors 141-119. Fox hitti úr 16 af 22 skotum og var með sjö stoðsendingar að auki. Hann hefur nú skorað 30 stig eða meira í sex af síðustu tíu leikjum sínum og er með 30,7 stig í leik á þeim tíma. Kings liðið hefur líka unnið fimm af síðustu sex.

Golden State lék án Stephen Curry fjórða leikinn í röð og Draymond Green var veikur. Andrew Wiggins skoraði mest fyrir liðið eða 26 stig en þeir Kelly Oubre Jr. og Nico Mannion voru með 19 stig hvor.

CJ McCollum skoraði 21 af 35 stigum sínum í fyrsta leikhluta þegar Portland Trail Blazers vann Miami Heat 125-122. Damian Lillard skoraði 22 stig þar á meðal þrjú síðustu stig leiksins af vítalínunni eftir að Trevor Ariza braut á hinum í þriggja stiga skoti þegar ein sekúnda var eftir.

Carmelo Anthony skoraði 20 stig og Enes Kanter var með 18 stig og 16 fráköst. Bam Adebayo og Tyler Herro skoruðu báðir 29 stig í fimmta tapi Miami liðsins í röð og Kendrick Nunn var með 22 stig.

Það vantaði mikið í Miami Heat liðið sem hafði skipt frá sér leikmönnum auk þess sem Jimmy Butler var veikur, Goran Dragic meiddur í baki og þeir Udonis Haslem og KZ Okpala eru báðir í sóttkví.

Los Angeles Clippers vann San Antonio Spurs annað kvöldið í röð og nú án þeirra Kawhi Leonard, Marcus Morris, Serge Ibaka og Patrick Beverley. Clippers var líka án Lou Williams sem liðið sendi til Atlanta Hawks í skiptum fyrir Rajon Rondo stuttu fyrir leikinn. Clippers vann leikinn 98-85 og hefur nú unnið fjóra leiki í röð en að sama skapi var þetta fjórða tap Spurs í röð.

Alec Burks skoraði 15 af 27 stigum sínum í fjórða leikhluta þegar New York Knicks vann 106-102 sigur á Washington Wizards. RJ Barrett bætti við 24 stigum, 10 fráköstum og 5 stoðsendingum en Knicks vann Wizards liðið líka fyrir tveimur dögum. Bradley Beal skoraði 25 stig fyrir Washington og Russell Westbrook hitti aðeins úr 3 af 15 skotum sínum en Russell Westbrook var þó með 13 stig, 18 fráköst og 9 stoðsendingar.