Hyggja á fram­leiðslu þátta um Karl Gústaf í anda The Crown

Variety segir frá þessu en það eru sjónvarpsstöðin TV4 og streymisveitan C More sem munu standa að framleiðslunni. Sænski höfundurinn Åsa Lantz, sem hélt utan um handrit á verðlaunamyndinni Selma, mun hafa yfirumsjón með handritinu.

Í þáttunum verður fjallað um ævi Karls Gústafs, þar með talið árin áður en hann tók við krúnunni árið 1973. Karl Gústaf settist á konungsstól að afa sínum látnum, en faðir hans, Gustaf Adolf, lést í flugslysi árið 1947. Karl Gústaf gekk svo að eiga Silvíu drottningu árið 1976.

Variety segir frá því að Lantz hafi um árabil safnað að sér göngum um konunginn. „Aðrir kóngar og drottningar eru sögð hafa haft áhrif á heimsatburði. Saga okkar konungs er nokkuð frábrugðin. Ekki jafn áberandi á alþjóðavísu en alveg jafn dramatísk og heillandi. Og fyrir mörg okkar, fullkomlega óþekkt,“ segir Lantz.

Búið er að upplýsa sænsku hirðina um áætlanirnar um gerð þáttanna, en ekki hefur verið haft beint samband við einstaka meðlimi konungsfjölskyldunnar.

Í samtali við DN segir að draumur Lantz sé að Joel Kinnaman muni fara með hlutverk konungsins í þáttunum. Kinnaman hefur meðal annars gert garðinn frægan fyrir hlutverk sitt í myndunum Snabba Cash og Suicide Squad.