Stjórnvöld bíða eftir hlutafjáraukningu Icelandair

Forsætisráðherra segist ekki útiloka neitt varðandi mögulega aðkomu stjórnvalda að rekstri Icelandair. Fyrirtækið sé ekki aðeins þjóðhagslega mikilvægt vegna flugsamgangna heldur hafi það gengt stóru hlutverki við uppbyggingu ferðaþjónustunnar í landinu.

Í fyrirspurnartíma á Alþingi í dag var Katrín Jakobsdóttir forsætisráðherra ítrekað spurð út í þær aðgerðir sem stjórnvöld hafa þegar gripið til og framhald slíkra aðgerða. Oddný G. Harðardóttir þingflokksformaður Samfylkingarinnar lýsti yfir miklum áhyggjum af stöðu Icelandair.

„Við eigum mikið undir því að fólk og varningur komist reglulega og örugglega til og frá landinu allt árið um kring. Komin er upp alvarleg staða í þessum efnum," sagði Oddný. Því vildu hún spyrja forsætisráherra um áform ríkisstjórnarinnar til að tryggja flugsamgöngur og stöðu Icelandair.

„Því aðgerðirnar sem voru kynntar fyrr í dag munu augljóslega ekki tryggja starfsemi Icelandair til lengri tíma. Þúsundir manna eiga afkomu sína undir starfsemi fyrirtækisins og það skiptir íslenskan almenning og íslenskt samfélag gríðarlega miklu máli að starfsemi og störf Icelandair séu varin,“ sagði Oddný.

Stjórnvöld útiloka ekkert varðandi Icelandair

Forsætisráðherra sagði þær aðgerðir sem stjórnvöld hefðu gripið til áður og nú síðast í morgun koma Icelandair til góða.

„Icelandair er mikilvægt fyrirtæki ekki bara fyrir flugsamgöngur til og frá landinu heldur hefur það líka verið undirstöðuaðili í ferðaþjónustu á Íslandi. Lykilaðili í vexti hennar á undanförnum árum,“ sagði Katrín. Þær aðgerðir sem greint hafi verið frá í morgun muni styðja við Icelandair í því verkefni að safna nýju hlutafé inn í félagið. Mikilvægt sé að þau áform gangi eftir.

„Ég hef ekki útilokað neitt um aðkomu ríkisins að þessum málum en það er mikilvægt að félagið geri sínar áætlanir og hafi sína framtíðarsýn á hreinu áður en til þess kemur,“ sagði forsætisráherra.

Brúarlánin koma brátt til framkvæmda

Sigmundur Davíð Gunnlaugsson formaður Miðflokksins og Þorgerður Katrín Gunnarsdóttir formaður Viðreisnar kröfu forsætisráherra hins vegar bæði um framtíðarsýn stjórnvalda. Þau sögðu aðgerðirnar sem greint var frá í morgun vissulega vera góða viðbót við fyrri aðgerðir en meira þyrfti til

„Þess hefur verið getið að þetta sé enn óútfært að miklu leyti. Þá ryfjar maður upp fyrsta aðgerðarpakkann,“ sagði Sigmundur Davíð. Hann hafi verið metinn á 230 milljarða þar sem lang stærsta aðgerðin hafi verið svo kölluð brúarlán með ríkisábyrgð til fyrirtækja.

„Núna næstum því sex vikum seinna virðast þau enn ekki komin til framkvæmda. Ég spyr þess vegna hvenær verður búið að útfæra það sem ráðherrann hæstvirtur kynnti í morgun. Hvenær kemst það til framkvæmda og hvenær, ef einhvern tíma, komast brúarlánin til framkvæmda,“ spurði formaður Miðflokksins.

Dýpsta kreppa á lýðveldistímanum

Katrín sagði rétt að frumvörp vegna aðgerðanna sem kynntar hafi verið í morgun væru ekki tilbúin en þau yrðu kynnt formönnum allra flokka áður en þau verði lögð fram. Stefnt sé að því að frumvörpin komi inn á Alþingi í fyrrihluta maí og gildi frá fyrsta degi þess mánaðar.

„Fjármálaráðuneytið og Seðlabankinn hafa lokið sinni samningsgerð um brúarlánin. Það er mjög mikilvægt að þau komist í gagnið strax. Því þetta er stór aðgerð og bankarnir hafa fengið töluverða hvata til að geta nýtt sér þessi brúarlán. Sem snúast ekki bara um 70 prósenta ríkisábyrgð. Þau snúast líka um lækkun sveiflujöfnunarauka, flýtingu á lækkun bankaskatts og svo framvegis og það er mjög mikilvægt að þetta úrræði nýtist sem skyldi,“ sagði forsætisráðherra.

Þá sagði Katrín ómögulegt að segja til um næstu aðgerðir stjórnvalda eða hvert umfang heildaraðgerða þeirra yrði.

 „Við erum stödd í kreppu sem væntanlega mun rata í sögubækurnar sem ein sú óvæntasta og jafnframt sú dýpsta sem við höfum staðið frami fyrir á lýðveldistímanum og þótt lengra væri leitað. Munu verða frekari aðgerðir? Að sjálfsögðu. Við erum stödd í miðjum storminum,“ sagði Katrín Jakobsdóttir.