Al­fons við það að skrá sig í sögu­bækurnar í Noregi

Alfons Sampsted, hægri bakvörður Bodö/Glimt í norsku úrvalsdeildinni sem og U21 árs landsliðs Íslands, er við við það að skrá sig í sögubækur norskrar knattspyrnu ásamt liðsfélögum sínum. 

Liðið trónir á toppi deildarinnar og er aðeins stigi frá því að tryggja sér sinn fyrsta meistaratitil þó enn séu sex umferðir eftir.

Framganga liðsins hefur verið það góð að Rory Smith sem starfar hjá The New York Times ákvað aðeins að fjalla um þetta öskubuskuævintýri. Þar er farið yfir víðan völl, hvernig lið í bæ með 50 þúsund íbúa er við það að landa sínum fyrsta meistaratitli. 

Spilamennskuna sem hefur skilað 21 sigri í 24 leikjum og 83 mörkum ásamt svo mörgu öðru.

Við Íslendingar eigum okkar fulltrúa í þessu liði. Alfons Sampsted gekk til liðs við Bodö/Glimt fyrir tímabilið. Alfons er fæddur 1998 en hefur verið í atvinnumennsku frá árinu 2017. Það hefur þó ekki alltaf verið dans á rósum og kom hann til að mynda heim og spilaði átta leiki með uppeldisfélagi sínu Breiðablik sumarið 2019.

Þar áður hafði hann verið á láni hjá liðum í sænsku B-deildinni en samdi svo við norska félagið eftir lánsdvölina í Kópavogi. Það var sannkallað heillaskref enda hefur hann átt góðu gengi að fagna í Noregi sem og með U21 árs landsliði Íslands þar sem hann hefur leikið alls 29 leiki.

Alfons ræddi við Fótbolti.net á dögunum og fór yfir þetta magnaða tímabil.

„Ég hef aldrei upplifað annað eins. Þetta hefur verið draumi líkast. Það er skemmtileg stemning í bænum. Það er jákvæðni og allir mjög glaðir hvernig er búið að vera að ganga. Þetta hefur vakið athygli á ótrúlegustu stöðum.“

„Við erum með þannig hugarfar að við förum inn í leikinn til að spila skemmtilegan fótbolta og skila eins góðri frammistöðu og hægt er. Hingað til hefur kerfið okkar virkað það vel og við höfum spilað mjög skemmtilegan fótbolta.“ sagði hægri bakvörðurinn öflugi við Fótbolti.net.

„Tækifærin voru takmörkuð í Svíþjóð. Ég nýtti tímann til að bæta mig sem leikmaður en maður vill spila leiki á endanum. Það er komið núna og það er mjög gaman. Ég fann það mjög fljótlega að ég henta vel í þessu kerfi. Strákarnir eru opnir og mjög móttækilegir fyrir manni. Ég kom inn í hópinn og leið mjög fljótlega eins og heima,“ sagði Alfons að lokum um vistaskiptin til Noregs.

Viðtal Fótbolti.net við Alfons má lesa í heild sinni hér.

Alfons og liðsfélagar hans í U21 árs landsliði Íslands eiga enn möguleika á að komast í umspil um sæti á Evrópumótinu í þeim aldursflokki. Mæta þeir Írlandi ytra á morgun, sunnudag.