Alls greindust sex­tán innan­lands í gær

Alls greindust sextán með kórónuveiruna innanlands í gær. Fjórtán af þeim sem greindust í gær voru í sóttkví , eða 87,5 prósent. Tveir þeirra sem greindust í gær voru utan sóttkvíar, eða um 12,5 prósent.

Þetta kemur fram í uppfærðum tölum á vefnum covid.is. Alls eru 75 nú á sjúkrahúsi vegna Covid-19, þar af þrír á gjörgæslu. Í gær voru áttatíu á sjúkrahúsi og fjórir á gjörgæslu.

Sjö smit greindist á landamærum. Fimm virk smit og er niðurstöðu mótefnamælingar beðið í tilvikum tveggja.

621 manns eru nú í einangrun, samanborið við 634 í gær. Þá eru 1.060 í sóttkví í dag, samanborið við 1.046 í gær.

Af þeim sextán sem greindust innanlands í gær greindust þrettán eftir að tekin voru svokölluð einkennasýni, en þrjú eftir svokallaða sóttkvíar- og handahófsskimun.

Nýgengi innanlandssmita, þ.e. fjöldi smitaðra á hverja 100 þúsund íbúa undanfarnar tvær vikur, er nú 142,1 en var 151,3 í gær. Þá er nýgengi landamærasmita nú 15,5, en var 17,5 í gær.

Nú hafa 5.101 manns greinst smitaðir af kórónuveiru frá upphafi faraldursins. Á síðunni segir ennfremur að af þeim veikst hafa af Covid-19 eru 23 nú látnir.

Alls voru tekin 419 einkennasýni hjá sýkla- og veirufræðideild Landspítalans og Íslenskri erfðagreiningu í gær og 348 sýni á landamærunum eða í seinni landamæraskimun. Þá voru 88 sýni tekin við sóttkvíar- og handahófsskimun.

Fréttin hefur verið uppfærð.