Meistaradeildin hefst í dag: Eiður Smári var í þrennuliði Barcelona

Meistaradeild Evrópu í fótbolta fer aftur af stað í dag þegar riðlakeppnin hefst með átta leikjum í riðlum E til H. Í síðustu upphitunargreininni fyrir Meistaradeildina rifjum við upp síðasta tímabil Eiðs Smára Guðjohnsen með Barcelona, þegar hann varð fyrsti Íslendingurinn til að vinna Meistaradeildina.

Eiður var í þrjú tímabil hjá Barcelona, tvö undir stjórn Franks Rijkaard og eitt undir stjórn Peps Guardiola. Og tímabilið með Guardiola var eftirminnilegt í meira lagi.

Eftir vonbrigðatímabil 2007-08 var Guardiola ráðinn knattspyrnustjóri Barcelona, félagsins sem hann ólst upp hjá og lék stærstan hluta ferilsins með. Þetta var fyrsta tímabil Guardiolas sem þjálfari aðalliðs en hann hafði þjálfað B-lið Barcelona tímabilið 2007-08. Hann hreinsaði til hjá Barcelona og lét m.a. stórstjörnurnar Ronaldinho og Deco fara.

Eftir að hafa aðeins fengið eitt stig í fyrstu tveimur umferðunum í spænsku úrvalsdeildinni fór Barcelona á mikið flug og vann nítján af næstu 20 leikjum sínum. Börsungar komust á toppinn í 9. umferð og voru þar út tímabilið. Þeir hrósuðu einnig sigri í spænsku bikarkeppninni.

Börsungum gekk líka allt í haginn í Meistaradeildinni. Þeir unnu C-riðil með þrettán stig og skoruðu átján mörk í leikjunum sex í riðlakeppninni. Eiður kom við sögu í þremur leikjum og var einu sinni í byrjunarliðinu í riðlakeppninni.

Barcelona átti ekki í miklum vandræðum með að slá Lyon og Bayern München úr leik í sextán og átta liða úrslitunum. Öðru máli gengdi um gömlu félaga hans Eiðs í Chelsea sem Barcelona mætti í undanúrslitunum. 

Fyrri leiknum á Nývangi lyktaði með markalausu jafntefli. Michael Essien kom Chelsea yfir í seinni leiknum á Stamford Bridge strax á 9. mínútu. Hagur Chelsea vænkaðist enn frekar þegar Eric Abidal var rekinn af velli á 66. mínútu. 

Þrátt fyrir að vera marki undir og manni færri gáfust Börsungar ekki upp og Andrés Iniesta skoraði jöfnunarmark þeirra þegar þrjár mínútur voru komnar fram yfir venjulegan leiktíma og tryggði þeim sæti í úrslitaleiknum. Chelsea-menn voru afar ósáttir við dómgæslu hins norska Toms Henning Øvrebø og töldu sig svikna um nokkrar vítaspyrnur. Didier Drogba var sérstaklega heitt í hamsi og var dæmdur í þriggja leikja bann fyrir óhófleg mótmæli.

Eiður kom inn á undir lok leiksins á Stamford Bridge. Það var hans 45. og síðasti Meistaradeildarleikur á ferlinum. Hann sat allan tímann á bekknum í úrslitaleiknum þar sem Barcelona sigraði Manchester United, 2-0.

Í viðtali í Sportinu í kvöld í vor sagðist Eiður sjá eftir því að hafa ekki beðið Guardiola um að fá að koma inn á í úrslitaleiknum. „Sennilega það eina sem ég sé eftir á ferlinum er að hafa ekki rifið í Guardiola og sagt: gefðu mér eina mínútu. Hann lét mig hita upp og ég var við það að koma inn á. Ég sé eftir að hafa beðið hann um að gefa mér mínútu þannig ég gæti sagt að ég hafi verið inni á vellinum,“ sagði Eiður.

Eiður lék 34 leiki með Barcelona í öllum keppnum draumatímabilið 2008-09 og skoraði fjögur mörk. Alls lék hann 114 leiki með Barcelona á árunum 2006-09 og skoraði nítján mörk.

Eins og áður sagði lék Eiður 45 leiki í Meistaradeild Evrópu með Chelsea og Barcelona. Hann skoraði sjö mörk í þessum 45 leikjum og er bæði leikja- og markahæsti Íslendingurinn í Meistaradeildinni.

Eftir tímabilið 2008-09 yfirgaf Eiður Barcelona og fór til Monaco í Frakklandi. Þar stoppaði hann stutt við og fór svo aftur til Englands.

Meistaradeildin verður áfram í beinni á Stöð 2 Sport og þar verða líka Meistaradeildarmessan og Meistaradeildarmörkin á hverju kvöldi sem leikir fara fram í riðlakeppninni. Fyrstu leikirnir í beinni verða Dynamo Kiev-Juventus (Þriðjudagurinn 20. október klukkan 16.45) og PSG-Manchester United (Þriðjudagurinn 20. október klukkan 18.50).