Ríkisstjórnin mætt á Bessastaði

Allir ellefu ráðherrar ríkisstjórnar Íslands voru mættir á Bessastaði klukkan þrjú í dag til fundar við Guðna Th. Jóhannesson, forseta Íslands. Um er að ræða reglubundin fund ríkisráðs í aðdraganda setningar Alþingis.

Alþingi verður sett á fimmtudaginn í 151. skipti. Þingsetning verður að deginum og stefnuræða Katrínar Jakobsdóttur forsætisráðherra og umræður um hana að kvöldi sama dags.

Fyrsta umræða um fjárlagafrumvarp 2021 og fyrri umræða um fjármálaáætlun verða aðalmál 2. viku þingsins og hefst umræðan mánudaginn 5. október.