Ekið á barn á reiðhjóli í Njarðvík

Ekið var á barn sem var á reiðhjóli á Njarðvíkurbraut á dögunum. Drengurinn sem um ræðir fann til verkja og var fluttur með sjúkrabifreið á Landspítala. Þetta er á meðal slysa sem komið hafa upp í umdæmi lögreglunnar á Suðurnesjum undanfarna daga.

Slys varð þegar ung stúlka missti stjórn á vespu og skall með hökuna á gangstéttarbrún. Stúlkan var flutt með sjúkrabifreið á Heilbrigðisstofnun Suðurnesja.

Karlmaður sem var við vinnu sína á Keflavíkurflugvelli fékk járnstykki í höfuðið og rotaðist. Hann var fluttur með sjúkrabifreið undir læknishendur.

Þá datt drengur á reiðhjóli í Sandgerði og var talið að hann hefði úlnliðsbrotnað. Hann var fluttur með sjúkrabifreið á HSS.