„Sara er með eldmóð og þrautseigju á öðru stigi“

„Þetta var geggjað. Þótt ég hafi verið rithöfundur í smá stund er ég fyrst og fremst fótboltaþjálfari og ég man ekki eftir að hafa séð aðra eins frammistöðu hjá kvennaliði og hjá Lyon í fyrri hálfleik. Og það er ótrúlega gaman að Sara hafi verið hluti af þessu,“ sagði Magnús Örn Helgason fótboltaþjálfari í samtali við Vísi.

Magnús ritaði ævisögu Söru Bjarkar Gunnarsdóttur, nýbakaðs Evrópumeistara, sem kom út fyrir síðustu jól. Ævisagan heitir Óstöðvandi og það var einmitt það sem Sara var í úrslitaleik Meistaradeildarinnar í fyrradag: óstöðvandi. Hún var að margra mati besti leikmaður vallarins og kórónaði stórleik sinn með því að skora þriðja mark Lyon undir lokin.

Þetta var annar úrslitaleikur Söru í Meistaradeildinni en hún var í tapliði Wolfsburg gegn Lyon fyrir tveimur árum. Hún fór þá meidd af velli í seinni hálfleik en Lyon vann leikinn, 4-1 eftir framlengingu.

„Eins og kemur fram í bókinni hvetur mótlæti hana fremur en að letja hana í að vinna enn harðar að því að láta drauma sína rætast. Það að hafa komist svona nálægt þessu fyrir tveimur árum gerir þetta örugglega enn sætara en að hafa unnið þetta í fyrstu tilraun,“ sagði Magnús.

Sara gekk í raðir Lyon í síðasta mánuði og var ekki lengi að vinna sér sæti í byrjunarliðinu hjá þessu ógnarsterka liði.

„Það er rosaleg samkeppni þarna og ég held það segi svolítið mikið um viðhorfið hjá Söru, að hafa náð að stimpla sig inn á svona skömmum tíma,“ sagði Magnús.

En hvað einkennir Söru sem afreksíþróttakonu?

„Ég myndi segja að það sé eldmóður og þrautseigja á öðru stigi en ég hef allavega áður kynnst hjá íþróttafólki á Íslandi. Þessi þrá eftir að gera alltaf betur og meira. Hún fór í besta liðið í Svíþjóð [Rosengård] og vann allt þar, ár eftir ár. Svo fór hún til Þýskalands og vann tvöfalt fjögur ár í röð,“ sagði Magnús og bætti við Sara slaki ekki á þrátt fyrir góðan árangur, heldur haldi áfram að vinna að markmiðum sínum.

„Ég skynjaði mjög sterkt að hún væri langt frá því að vera södd. Hún velti því ekki einu sinni fyrir sér að fara til deildir þar sem er kannski þægilegt að vera og miklir peningar. Hún vildi komast enn lengra og þá var í raun bara eitt lið sem kom til greina. Hún stökk á það og stimplaði sig inn eins og skot.“

Magnús er þjálfari meistaraflokks kvenna hjá Gróttu og hefur þjálfað yngri flokka hjá félaginu um langt árabil. Hann segir að Sara sé gríðarlega góð og mikilvæg fyrirmynd fyrir yngri iðkendur.

„Það að hafa svona mikla fyrirmynd frá okkar litla landi hvetur unga og áhugasama iðkendur til dáða, að sjá að það sé hægt að komast á toppinn þótt þú sért frá Íslandi,“ sagði Magnús sem hvetur stráka, ekki síður en stelpur, til að taka Söru sér til fyrirmyndar.

„Þegar bókin kom út sá maður að allar stelpur í fótbolta eru klárar á því hver Sara er og hvað hún hefur gert. En maður myndi vilja sjá meira af því að ungir strákar í fótbolta nýti sér afreksíþróttakonu eins og Söru sem fyrirmynd. Það var áberandi þegar við vorum að árita bókina að í röðunum voru annað hvort stelpur eða fjölskyldumeðlimir sem ætluðu að gefa fótboltastelpum bókina. Það varr mjög sjaldan sem maður sá strák eða einhverja sem ætluðu að gefa strákum bókina. Ég held að þarna getum við Íslendingar gert betur, að kynna stráka í íþróttum fyrir kvenkyns fyrirmyndum.“

En kemur uppfærð útgáfa af Óstöðvandi út um næstu jól?

„Það hefur ekki verið rætt,“ svaraði Magnús og hló.