Rifjuðu upp þegar mót­herji Haf­þórs missti 220 kíló á höfuðið á sér

Eddie Hall er enskur aflraunamaður sem ætlar að berjast í boxhringnum við Hafþór Júlíus Björnsson á næsta ári.

Englendingurinn hefur í gegnum tíðina verið að keppa á sömu mótum og Hafþór Júlíus og þeir oftar en ekki barist um gullið.

Það andar þó köldu á milli þeirra og boxbardagi þeirra á næsta ári verður ansi athyglisverður enda báðir að berjast í boxi í fyrsta sinn.

YouTube-síða keppninnar Sterkasti maður heims rifjaði upp feril Eddie á síðu sinni í gær og úr varð 35 mínútna þáttur.

Þar voru rifjuð upp helstu afrek Englendingsins en einnig slæm mistök; eins og þegar hann missti 220 kíló á höfuðið á sér á keppni árið 2015.

Einnig voru rifjuð upp ummæli Hafþórs um hvort að hann héldi að Eddie eða Benedikt Magnússon myndu slá metið í réttstöðulyftu.

Þar hafði Hafþór, eðlilega, meiri trú á Íslendingnum en annað kom svo í ljós.

Þáttinn má sjá hér að neðan.