Gna­bry stráði salti í sárin hjá stuðnings­mönnum Chelsea á Twitter eftir leikinn

Serge Gnabry, leikmaður Bayern Munchen, lét ekki nægja að skora tvö mörk gegn Chelsea í gær því hann fór einnig á Twitter og stráði salti í sárin hjá stuðningsmönnum Chelsea.

Gnabry skoraði tvö mörk er Bæjarar unnu 3-0 sigur á Brúnni í gær er liðin mættust í fyrri leik 16-liða úrslitanna í Meistaradeildinni. Einvíginu er þar með nánast lokið.

Gnabry hefur farið á kostum í þeim leikjum sem hann hefur spilað á Englandi á leiktíðinni en hann fór einnig illa með Tottenham fyrr á leiktíðinni.

Það er ljóst að honum líkar betur á Englandi nú en áður því hann lék með Arsenal frá árunum 2011 til 2016. Hann lék þó aðeins tíu leiki með liðinu áður en hann fór til Werder Bremen.

Hann ákvað þó að nudda stuðningsmönnum Chelsea enn meira upp úr tapinu því hann setti á Twitter-síðu sína eftir leikinn að „London væri enn rauð.“ Chelsea og Arsenal eru grannar og hafa stuðningsmenn liðanna löngum eldað grátt silfur.

London still red.. #FCBpic.twitter.com/3108THrtzv

— Serge Gnabry (@SergeGnabry) February 25, 2020