Spurði um stefnu Útlendingastofnunar í málefnum hinsegin fólks

Þórhildur Sunna Ævarsdóttir, formaður stjórnskipunar- og eftirlitsnefndar, telur að skýra þurfi stefnu og verkferla Útlendingastofnunar hvað varðar mál hinsegin fólks. Hún hefur kallað eftir upplýsingum frá stofnuninni. Stjórnskipunar- og eftirlitsnefnd fjallaði á fundi sínum um morgun um skýrslu Ríkisendurskoðunar frá 2018 um verklag og starfshætti Útlendingastofnunar.

„Við vorum að fylgja því eftir hvað hafi verið gert til þess að bregðast við þeim athugasemdum sem fram komu í skýrslu Ríkisendurskoðunar um starf stofnunarinnar,“ segir Þórhildur Sunna. „Að mínu mat þá mætti nú spýta talsvert í lófana og það vantar ennþá töluvert uppá að það sé skýrt hvaða verkreglum stofnunin er að fylgja þegar hún er að taka ákvarðanir í málum.“

Það sé jákvætt að vinna hafi farið fram til að bregðast við athugasemdum en á sama tíma sé það hvorki aðgengilegt umsækjendum né almenningi hvað í þeirri vinnu felist að sögn Þórhildar Sunnu. „Sömuleiðis þá vantar greinilega ennþá upp á framtíðarstefnumótun og að það geti farið fram einhvers konar mat á því hvernig starfsemi stofnunarinnar verður til framtíðar.“

Ali á vantrausti að verkferlar liggi ekki fyrir

Mál Maní Shahidi, sautján ára transpilts frá Íran, hefur vakið mikla athygli. Kærunefnd útlendingamála hefur gefið lögmanni hans frest til 24. febrúar til að skila frekari gögnum í máli hans og fjölskyldu hans. Að óbreyttu verður fjölskyldunni vísað aftur vísað til Portúgal.

Þórhildur Sunna segir mál Maní ekki hafa verið meginviðfangsefni fundarins en það hafi borist í tal. „Ég spurði alla veganna sérstaklega út í hvort það væri gagnger stefna stjórnvalda að huga sérstaklega að viðkvæmum hópum eins og LGBTI ungmennum eða LGBTI hópum og það virðist ekki vera að það hafi farið fram einhver heildstæð stefnumótun um það þótt að einstaka kvótaflóttamenn hafi kannski fengið leyfi hér á þeim forsendum.“

Ekki sé til staðar sérstök stefna innan stofnunarinnar til að huga sérstaklega að þessum hópi. Það ali að hennar mati á vantrausti að ekki liggi fyrir hvaða verkferlum sé verið að fylgja í þeim efnum.

„Það er kannski einna helst sá lærdómur gagnvart málinu hans Maní sem að ég dró af þessum fundi, þótt hann varðaði ekki málið hans Maní beint, var einmitt þetta. Að við vitum ekki hvaða verklagsreglum Útlendingastofnun er að fylgja þegar kemur að svona málum og það hjálpar þá ekki þegar Útlendingastofnun er að segja að öllum ferlum hafi verið fylgt, að við höfum ekki aðgang að þeim reglum,“ segir Þórhildur Sunna.