Parið fannst í Hlöðuvík

Unga parið sem leitað var að á Hornströndum í nótt er fundið. Fólkið hafði náð að koma sér í neyðarskýlið í Hlöðuvík og fannst rétt fyrir klukkan átta í morgun.

Níu björgunarsveitarmenn leituðu að parinu í nótt sem hafði óskað eftir aðstoð rétt fyrir miðnætti. Vegna þess hversu lélegt farsímasamband er á svæðinu náði parið ekki að láta vita að það væri komið í öruggt skjól en hittu björgunarsveitarmenn þegar þeir komu að neyðarskýlinu.

Að sögn Davíðs Más Bjarnasonar, upplýsingafulltrúa hjá Landsbjörg, bar fólkið sig vel þegar björgunarsveitarmenn mættu í skýlið. Þau höfðu náð að koma sér úr þeim ógöngum sem þau lentu í og í öruggt skjól.

Leitaraðstæður voru nokkuð erfiðar þar sem mikil þoka var á svæðinu. Gönguhópar sem tóku þátt í leitinni voru ferjaðir á svæðið með björgunarskipinu Gísla Jóns.