Sárafátæktarsjóður Rauða krossins lagður niður

Sárafátæktarsjóður Rauða krossins á Íslandi hefur verið lagður niður, og mun því ekki taka við umsóknum um fjárhagsaðstoð til einstaklinga í komandi framtíð. Þetta kemur fram í bréfi sem Rauði krossinn sendi og fréttastofa hefur undir höndum.

Í bréfinu segir að stofnun sjóðsins hafi verið samþykkt á aðalfundi Rauða krossins árið 2018. Með stofnun sjóðsins hafi hreyfingin viljað fá betri innsýn í aðstæður þeirra sem búa við sárafátækt hér á landi. Þannig gæti félagið verið betur í stakk búið til að sinna málsvarahlutverki sínu, eins og segir í bréfinu.

„Sjóðurinn var hugsaður sem tímabundið átaksverkefni til tveggja ára, en byrjað var að taka við umsóknum í mars 2019 eftir um árs undirbúningsvinnu. Félagið telur sig nú hafa fengið góða mynd af aðstæðum umsækjanda sjóðsins og mun nú leggja áherslu á að halda úti öflugu málsvarastarfi fyrir fólk sem býr við mikinn skort ásamt því að vinna að öðrum verkefnum sem stuðla að mannúð og öðrum grunngildum Rauða krossins,“ segir í bréfinu, sem er undirritað af Hönnu Ruth Ólafsdóttur, verkefnastjóra í sárafátækt.