Handtekinn eftir að hafa tilkynnt um að maður hefði fallið í Ölfusá

Mikill viðbúnaður var hjá öllum viðbragðsaðilum í Árnessýslu eftir að tilkynning barst til lögreglu um að maður hefði fallið í Ölfusá í nótt.

Allar björgunarsveitir í Árnessýslu, auk lögreglu, sjúkraflutningamanna og slökkviliðs var kallað út og voru bátar sendir út til leitar. Þá var leitað úr lofti með drónum og frá landi með hitamyndavél.

Tilkynningin reyndist gabb

Frímann Birgir Baldursson, varðstjóri hjá Lögreglunni á Suðurlandi segir að tilkynningin hafi borist fljótlega eftir klukkan hálf eitt í nótt. Fljótlega eftir það hafi lögreglu farið að gruna að tilkynningin væri ekki á rökum reist og kom í ljós að hún reyndist gabb frá upphafi.

Haft var upp á tilkynnanda og var hann handtekinn vegna málsins og vistaður í fangageymslu í þágu rannsóknar.

Frímann segir í samtali við fréttastofu að málið sé litið alvarlegum augum. Tilkynningar af þessu tagi séu alltaf teknar alvarlega og allur tiltækur mannskapur kallaður út. Kostnaður af gabbi sem þessu geti hlaupið á mörg hundruð þúsund krónum.