Vann nítján af þrjátíu stórum titlum sem í boði voru á síðasta áratug

Anna Úrsúla Guðmundsdóttir, ein sigursælasta handboltakona Íslands frá upphafi, hefur lagt skóna á hilluna.

Á síðasta áratug (2010-19) vann Anna alls nítján stóra titla af þeim þrjátíu sem í boði voru. Þar er átt við Íslands-, bikar- og deildarmeistaratitla.

Anna varð sjö sinnum Íslandsmeistari á síðasta áratug, sjö sinnum deildarmeistari og fimm sinnum bikarmeistari.

Á sínu síðasta tímabili (2018-19) vann Anna þrennuna með Val. Hún vann einnig þrefalt með Val 2012 og Gróttu 2015.

Á árunum 2010-16 varð Anna sex sinnum Íslandsmeistari. Eina skiptið sem lið hennar vann ekki (2013) var hún ólétt og missti af úrslitakeppninni. 

Anna missti einnig af hluta tímabilanna 2016-17 og 2017-18 vegna barneigna. Eina einvígið um Íslandsmeistaratitilinn sem hún tapaði var gegn Fram 2018. Hin sjö unnust.

Stórir titlar Önnu Úrsúlu Guðmundsdóttur á árunum 2010-19:

Íslandsmeistari:

Með Val: 2010, 2011, 2012, 2014, 2019

Með Gróttu: 2015, 2016

Bikarmeistari:

Með Val: 2012, 2013, 2014, 2019

Með Gróttu: 2015

Deildarmeistari:

Með Val: 2010, 2011, 2012, 2013, 2018, 2019

Með Gróttu: 2015