Eddie Hall sendir Hafþóri grjóthörð skilaboð og sakar „Fjallið“ um óheiðarleika

Eddie Hall og Hafþór Júlíus Björnsson mætast í hnefaleikahringnum í Las Vegas á næsta ári og þeir eru löngu byrjaðir að hita upp fyrir þennan óvenjulega bardaga á milli þessara tröllvöxnu manna.

Eddie Hall ákvað nú síðast að senda Hafþóri grjóthörð skilaboð á Youtube þar sem hann sakar íslenska fjallið um óíþróttamannslega rógsherferð gagnvart sér og titlinum sterkasti maður heims sem Hall vann árið 2017.

Hafþór Júlíus hefur lengi talað um það að hann hafi verið rændur þessum heimsmeistaratitli fyrir þremur árum en Eddie Hall svarar nú með því að saka íslenska „Fjallið“ um að svindal á sér og Hall telur sig vera búinn að graf upp myndband sem sanni það.

„Eftir að ég vann titilinn sterkasti maður heims þá gat ekki beðið eftir því að snúa aftur heim til Bretlands og deila titlinum með mínu fólki. Áður en mér tókst að komast heim til fjölskyldu minnar til að segja þeim fréttirnar þá tók einn maður óíþróttamannslega hegðun og óheiðarleika upp á annað plan,“ sagði Eddie Hall sem sagði að allir miðlar heimsins höfðu hjálpað Hafþóri að dreifa þessum rógburði.

Hafþór Júlíus Björnsson kvartaði þar yfir því að hafa verið rændur titlinum sterkasti maður heims en Eddie Hall vann með einu stigi.

„Undanfarin þrjú ár hef ég í stað þess að svara spurningum um hvernig ég vann marga af bestu kraftajötnum sem hafa lifað, og Hafþór Björnsson er á þeim lista, þá er fólk að efast um það hvort ég hafi í raun unnið titilinn eða ekki,“ sagði Eddie Hall og hélt áfram:

„Hafþór Björnsson hefur verið að sverta orðspor mitt og dómarans Colin Bryce undanfarin þrjú. Af því að hann var „The Mountain“ úr Game of Thrones og stór sjónvarpsstjarna þá hlustaði fólk á hann og trúði honum. Ég er búinn að fá nóg af því að hlusta á þá vitleysu að Hafþór Björnsson hafi verið rændur og að dómarinn hafi svindlað á honum,“ sagði Eddie Hall.

„Í dag fann ég myndband sem á að enda allt slíkt tal og eyða um leið öllum efasemdunum um minn sigur. Ég áttaði mig þá á því hversu örvæntingarfullur einn maður getir verið þegar hlutirnir falla ekki með honum. Þetta myndband sýnir hvað virkilega gerðist á bak við tjöldin í keppninni árið 2017. Það er komi tími til að sannleikurinn komi í ljós og að við látum myndirnar tala,“ sagði Eddie Hall sem talaði síðan beint til Hafþórs.

„Hafþór Björnsson. Þú og já mennirnir þínir ættuð að skamma ykkar. Orð eru ódýr og ég hundleiður á því að hlusta á afsakanirnar frá ykkur. Þú varst einu sinni góður maður og ótrúlegt en satt þá leit ég einu sinni á þig sem vin. Já-mennirnir hafa eitrað fyrir þér,“ sagði Eddie Hall.

„Já-mennirnir þínir fá ekki að vera með þér í hringum á næsta ári þegar við boxum. Ef þeir verða með þá mun ég berja þá í klessu þangað til þeir breytast í nei-menn,“ sagði Eddie Hall sem sýndi síðan upptöku frá Giants live en hún var gerð af sögn Eddie Hall af sjálfstæða kvikmyndagerðarmanninum Andy Quinn sem er að gera heimildarmynd um allt það sem gekk á í keppninni Sterkasti maður heims árið 2017.

Eddie Hall vísaði síðan í myndband sem má sjá byrja hér fyrir neðan. Hann bað alla um að dæma sjálfa um það sem gerðist en myndbandið byrjar á því að Hafþór Július Björnsson neitar að taka í hendina á Eddie Hall á verðlaunapallinum.