Valur, Reggie og Ágúst með Keflavík næsta vetur

Körfuknattleiksdeild Keflavíkur hefur samið við Val Orra Valsson, Reggie Dupree og Ágúst Orrason um að spila áfram fyrir liðið á næstu leiktíð í Domino's-deildinni.

Valur Orri sneri aftur til Keflavíkur undir lok febrúar eftir að hafa spilað með Florida Tech í bandaríska háskólakörfuboltanum undanfarin ár. Hann kvaddi skólann sem stoðsendingahæsti leikmaður í sögu hans.

Valur náði aðeins að leika þrjá leiki með Keflavík, sem endaði í 2. sæti Domino's-deildarinnar, áður en tímabilið á Íslandi var flautað af vegna kórónuveirufaraldursins. Valur lék áður síðast með Keflavík tímabilið 2015-16 og skoraði þá 12,6 stig að meðaltali í leik, tók 4,5 fráköst og gaf 5,6 stoðsendingar.

Reggie, sem hefur spilað með Keflavík frá árinu 2014, skoraði 4,2 stig að meðaltali í leik í vetur og tók 1,2 fráköst. Ágúst skoraði 3,4 stig að meðaltali í leik en hann lék að meðaltali tæpar níu mínútur.

Áður höfðu Dominykas Milka og Deane Williams, lykilmenn í liði Keflavíkur á síðustu leiktíð, einnig skrifað undir samning þess efnis að þeir spili með liðinu næsta vetur.

Fleiri leikmenn hafa svo undanfarið samið við félagið, þeir Arnór Sveinsson, Elvar Snær Guðjónsson, Guðbrandur Helgi Jónsson, Sigurður Hólm Brynjarsson, Magnús Pétursson, Davíð Alexander Magnússon og Bjarki Freyr Einarsson.